hum ko KHush aaya tera humse KHafa ho jaana

ham ko ḳhush aayā tirā ham se ḳhafā ho jaanā

sar-ba-sar ḳhvāb kā ta.abīr-numā ho jaanā

chand ashkoñ ne chhupāyā hai mukammal manzar

ham pe khultā hī gayā terā judā honā

apnī ḳhvāhish tirī yādoñ meñ bhaTaktī hai kahīñ

jaise gul-gasht meñ titlī kā fanā ho jaanā

shāḳh-dar-shāḳh subuksār havāoñ kā guzar

ik qafas se kisī panchhī kā rahā ho jaanā

ashk girte hī khile phuul mire dāman meñ

rut badalte hī parindoñ kā sadā ho jaanā

ek saa.e kā hai ehsās mire sar pe sadā

kaun sochegā kabhī ḳhud se ḳhudā ho jaanā

āshnā ham bhī mohabbat se nahīñ haiñ hargiz

haa.e is rabt kā bhī nazr-e-anā ho jaanā

hum ko KHush aaya tera hum se KHafa ho jaana

sar-ba-sar KHwab ka tabir-numa ho jaana

chand ashkon ne chhupaya hai mukammal manzar

hum pe khulta hi gaya tera juda hona

apni KHwahish teri yaadon mein bhaTakti hai kahin

jaise gul-gasht mein titli ka fana ho jaana

shaKH-dar-shaKH subuksar hawaon ka guzar

ek qafas se kisi panchhi ka raha ho jaana

ashk girte hi khile phul mere daman mein

rut badalte hi parindon ka sada ho jaana

ek sae ka hai ehsas mere sar pe sada

kaun sochega kabhi KHud se KHuda ho jaana

aashna hum bhi mohabbat se nahin hain hargiz

hae is rabt ka bhi nazr-e-ana ho jaana