hum ko tasir-e-gham se marna hai

ham ko tāsīr-e-ġham se marnā hai

ab isī rañg meñ nikharnā hai

dil-e-muztar kā ḳhuun karnā hai

nāla-e-ġham meñ dard bharnā hai

zindagī kyā hai sabr karnā hai

ḳhuun kā ghūñT pī ke marnā hai

jāñ-nisārī qubūl ho ki na ho

ham ko apnī sī kar guzarnā hai

husn ho ishq ho junūñ ho ki hosh

sab se begāna dil ko karnā hai

ab koī zahr de ki bāda-e-nāb

ek paimāna ham ko bharnā hai

dekh lī ham ne ishq kī mīrās

is se aage bhī ab guzarnā hai

mauj-e-dariyā haiñ ham hamārā kyā

kabhī miTnā kabhī ubharnā hai

DhūñDhtā phirtā huuñ nigāh-e-ḳhulūs

dil-e-murda ko zinda karnā hai

samm-e-qātil 'jigar' nahīñ miltā

dil kā qissa tamām karnā hai

hum ko tasir-e-gham se marna hai

ab isi rang mein nikharna hai

dil-e-muztar ka KHun karna hai

nala-e-gham mein dard bharna hai

zindagi kya hai sabr karna hai

KHun ka ghunT pi ke marna hai

jaan-nisari qubul ho ki na ho

hum ko apni si kar guzarna hai

husn ho ishq ho junun ho ki hosh

sab se begana dil ko karna hai

ab koi zahr de ki baada-e-nab

ek paimana hum ko bharna hai

dekh li hum ne ishq ki miras

is se aage bhi ab guzarna hai

mauj-e-dariya hain hum hamara kya

kabhi miTna kabhi ubharna hai

DhunDhta phirta hun nigah-e-KHulus

dil-e-murda ko zinda karna hai

samm-e-qatil 'jigar' nahin milta

dil ka qissa tamam karna hai