hum logon ko apne dil ke raaz batate rahte hain

ham logoñ ko apne dil ke raaz batāte rahte haiñ

log hamārī bāteñ sun kar hañste hañsāte rahte haiñ

jin lamhoñ ne luuT liyā thā mere dil kī duniyā ko

aksar merī mahfil-e-ġham meñ aate jaate rahte haiñ

duniyā vāloñ kī bātoñ se un kā jī kyuuñ jaltā hai

duniyā to dīvānī hai vo kyuuñ ghabrāte rahte haiñ

ham ko ġham-e-daurāñ bhī nahīñ hai aur ġham-e-jānāñ bhī nahīñ

jaane phir kyuuñ baat baat par ashk bahāte rahte haiñ

ham raahī ham dīvāne ādāb-e-safar ko kyā jāneñ

har manzil har rāhguzar meñ ḳhaak uḌāte rahte haiñ

mujh ko har ik afsāne meñ apnā aks nazar aa.e

log mujhe hī mere ġham kā haal sunāte rahte haiñ

vo dīvāna baat baat par raat raat bhar rotā hai

garche ham 'shahzād' ko ḳhalvat meñ samjhāte rahte haiñ

hum logon ko apne dil ke raaz batate rahte hain

log hamari baaten sun kar hanste hansate rahte hain

jin lamhon ne luT liya tha mere dil ki duniya ko

aksar meri mahfil-e-gham mein aate jate rahte hain

duniya walon ki baaton se un ka ji kyun jalta hai

duniya to diwani hai wo kyun ghabraate rahte hain

hum ko gham-e-dauran bhi nahin hai aur gham-e-jaanan bhi nahin

jaane phir kyun baat baat par ashk bahate rahte hain

hum rahi hum diwane aadab-e-safar ko kya jaanen

har manzil har rahguzar mein KHak uDate rahte hain

mujh ko har ek afsane mein apna aks nazar aae

log mujhe hi mere gham ka haal sunate rahte hain

wo diwana baat baat par raat raat bhar rota hai

garche hum 'shahzad' ko KHalwat mein samjhate rahte hain