hum mai-kade se mar ke bhi bahar na jaenge

ham mai-kade se mar ke bhī bāhar na jā.eñge

mai-kash hamārī ḳhaak ke sāġhar banā.eñge

vo ik kaheñge ham se to ham sau sunā.eñge

muñh ā.eñge hamāre to ab muñh kī khā.eñge

kuchh chārasāzī nāloñ ne kī hijr meñ mirī

kuchh ashk mere dil kī lagī ko bujhā.eñge

vo misl-e-ashk uTh nahīñ saktā zamīn se

jis ko huzūr apnī nazar se girā.eñge

jhoñke nasīm-e-sub.h ke aa aa ke hijr meñ

ik din charāġh-e-hastī-e-āshiq bujhā.eñge

sahrā kī gard hogī kafan mujh ġharīb kā

uTh kar bagūle merā janāza uThā.eñge

ab Thaan lī hai dil meñ ki sar jaa.e yā rahe

jaise uThegā bār-e-mohabbat uThā.eñge

gardish ne merī charḳh kā chakrā diyā dimāġh

nāloñ se ab zamīñ ke tabaq thartharāeñge

'bedam' vo ḳhush nahīñ haiñ to achchhā yūñhī sahī

nā-ḳhush hī ho ke ġhair mirā kyā banā.eñge

hum mai-kade se mar ke bhi bahar na jaenge

mai-kash hamari KHak ke saghar banaenge

wo ek kahenge hum se to hum sau sunaenge

munh aaenge hamare to ab munh ki khaenge

kuchh chaarasazi nalon ne ki hijr mein meri

kuchh ashk mere dil ki lagi ko bujhaenge

wo misl-e-ashk uTh nahin sakta zamin se

jis ko huzur apni nazar se giraenge

jhonke nasim-e-subh ke aa aa ke hijr mein

ek din charagh-e-hasti-e-ashiq bujhaenge

sahra ki gard hogi kafan mujh gharib ka

uTh kar bagule mera janaza uThaenge

ab Than li hai dil mein ki sar jae ya rahe

jaise uThega bar-e-mohabbat uThaenge

gardish ne meri charKH ka chakra diya dimagh

nalon se ab zamin ke tabaq thartharaenge

'bedam' wo KHush nahin hain to achchha yunhi sahi

na-KHush hi ho ke ghair mera kya banaenge