hum mein bhi aur unhon mein pahle jo yariyan thin

ham meñ bhī aur unhoñ meñ pahle jo yāriyāñ thiiñ

donoñ diloñ meñ kyā kyā ummīdvāriyāñ thiiñ

vo muntazir ki aaveñ ham pur-tapish ki jāveñ

is Dhab kī har do jānib be-iḳhtiyāriyāñ thiiñ

na zabt hai nigah kā na ruk sake nazāra

kyā shauq-varziyāñ thiiñ kyā be-qarāriyāñ thiiñ

uThne meñ baiThne meñ hañsne meñ bolne meñ

kuchh be-shu.ūriyāñ thiiñ kuchh hoshyāriyāñ thiiñ

jis jā 'nazīr' aa kar hotī haiñ ulfateñ to

vaañ aisī aisī kitnī ishrat-shi.āriyāñ thiiñ

hum mein bhi aur unhon mein pahle jo yariyan thin

donon dilon mein kya kya ummidwariyan thin

wo muntazir ki aawen hum pur-tapish ki jawen

is Dhab ki har do jaanib be-iKHtiyariyan thin

na zabt hai nigah ka na ruk sake nazara

kya shauq-warziyan thin kya be-qarariyan thin

uThne mein baiThne mein hansne mein bolne mein

kuchh be-shuuriyan thin kuchh hoshyariyan thin

jis ja 'nazir' aa kar hoti hain ulfaten to

wan aisi aisi kitni ishrat-shiariyan thin