hum nahin milte nahin milte hain hum sham ke baad

ham nahīñ milte nahīñ milte haiñ ham shaam ke ba.ad

phir bhī aa jaate haiñ kuchh ahl-e-karam shaam ke ba.ad

din vo zālim hai ki Dhātā hai sitam shaam ke ba.ad

baḌhtā jaatā hai mirā koh-e-alam shaam ke ba.ad

jaane lag jaate haiñ sab sū-e-haram shaam ke ba.ad

aur vahāñ phir se vahī jhūTī qasam shaam ke ba.ad

apnī yādoñ se ġham-e-shām kī chhuTTī rakkheñ

hone lag jaatī hai aañkh aur bhī nam shaam ke ba.ad

biivī bachchoñ kī hañsī asl kamā.ī hai mirī

bas yahī bachtī hai le de ke raqam shaam ke ba.ad

mai-kadā saare masā.il ko miTā detā hai

mas.ala diiñ kā vahāñ hai na dharam shaam ke ba.ad

din meñ to ḳhuub satā.ish kī sanad miltī hai

khulte jaate haiñ mire saare bharam shaam ke ba.ad

vo jo jaatā hai to mujh ko bhī liye jaatā hai

haa.e ho jaatā huuñ maiñ aur bhī kam shaam ke ba.ad

aaj kyā lenā hai kyā khānā hai 'abdul-qādir'

sar uThā.e hue phirte haiñ ye ġham shaam ke ba.ad

hum nahin milte nahin milte hain hum sham ke baad

phir bhi aa jate hain kuchh ahl-e-karam sham ke baad

din wo zalim hai ki Dhata hai sitam sham ke baad

baDhta jata hai mera koh-e-alam sham ke baad

jaane lag jate hain sab su-e-haram sham ke baad

aur wahan phir se wahi jhuTi qasam sham ke baad

apni yaadon se gham-e-sham ki chhuTTi rakkhen

hone lag jati hai aankh aur bhi nam sham ke baad

biwi bachchon ki hansi asl kamai hai meri

bas yahi bachti hai le de ke raqam sham ke baad

mai-kada sare masail ko miTa deta hai

masala din ka wahan hai na dharam sham ke baad

din mein to KHub sataish ki sanad milti hai

khulte jate hain mere sare bharam sham ke baad

wo jo jata hai to mujh ko bhi liye jata hai

hae ho jata hun main aur bhi kam sham ke baad

aaj kya lena hai kya khana hai 'abdul-qadir'

sar uThae hue phirte hain ye gham sham ke baad