ham-nashin aisi koi tadbir honi chahiye

ham-nashīñ aisī koī tadbīr honī chāhiye

mere qabze meñ mirī taqdīr honī chāhiye

ḳhatm honā chāhiye ab qissa-e-dair-o-haram

ḳhānqāh-e-zindagī ta.amīr honī chāhiye

imtiyāz-e-kufr-o-īmāñ vaqt par ho jā.egā

dāvat-e-mai-ḳhāna ālamgīr honī chāhiye

aur baḌh jaa.eñ zarā tishna-labī kī talḳhiyāñ

daur-e-sāġhar meñ abhī tāḳhīr honī chāhiye

is tarah to nazm-e-ālam muntashir ho jā.egā

ḳhud-parastī qābil-e-tāzīr honī chāhiye

rahzan-e-īmāñ haiñ donoñ shaiḳh ho yā barhaman

in se bachne kī koī tadbīr honī chāhiye

markaz-e-husn-o-mohabbat matl.a-e-mehr-o-vafā

dil ke ā.īne meñ ik tasvīr honī chāhiye

tā-ba-kai ye lan-tarānī hoshiyār ai barq-e-tūr

ārzū-e-dīd kī tauqīr honī chāhiye

tā-ba-kai ye be-niyāzī ai harīfān-e-suḳhan

ab zabān-e-'rāz' ālamgīr honī chāhiye

ham-nashin aisi koi tadbir honi chahiye

mere qabze mein meri taqdir honi chahiye

KHatm hona chahiye ab qissa-e-dair-o-haram

KHanqah-e-zindagi tamir honi chahiye

imtiyaz-e-kufr-o-iman waqt par ho jaega

dawat-e-mai-KHana aalamgir honi chahiye

aur baDh jaen zara tishna-labi ki talKHiyan

daur-e-saghar mein abhi taKHir honi chahiye

is tarah to nazm-e-alam muntashir ho jaega

KHud-parasti qabil-e-tazir honi chahiye

rahzan-e-iman hain donon shaiKH ho ya barhaman

in se bachne ki koi tadbir honi chahiye

markaz-e-husn-o-mohabbat matla-e-mehr-o-wafa

dil ke aaine mein ek taswir honi chahiye

ta-ba-kai ye lan-tarani hoshiyar ai barq-e-tur

aarzu-e-did ki tauqir honi chahiye

ta-ba-kai ye be-niyazi ai harifan-e-suKHan

ab zaban-e-'raaz' aalamgir honi chahiye