ham-nashin teri shikayat se ji Darta hai

ham-nashīñ terī shikāyāt se jī Dartā hai

tere andāza-e-jazbāt se jī Dartā hai

ahd-e-māzī kī koī baat na dohrā ai dost

apne guzre hue lamhāt se jī Dartā hai

ab ke phir mujh se na ho rang-e-bahārāñ māyūs

apnī be-rañgī-e-jazbāt se jī Dartā hai

ai falak mujh pe to ehsān bahut haiñ tere

haañ magar terī rivāyāt se jī Dartā hai

bhar na deñ jazba-e-sāda meñ tamannā kā ye rang

apne rangīn ḳhayālāt se jī Dartā hai

jām-o-mīnā pe bhī pahre haiñ zabāñ par bhī muhr

mohtasib terī isī baat se jī Dartā hai

pahle ayyām basar hote the be-ḳhauf-o-ḳhatar

is zamāne meñ to din raat se jī Dartā hai

kal thā raftār-e-jahāñ se na badalne kā gila

ab badalte hue hālāt se jī Dartā hai

chauñk uTTheñ na sulā.e hue jazbāt 'nasīm'

kaale bādal bharī barsāt se jī Dartā hai

ham-nashin teri shikayat se ji Darta hai

tere andaza-e-jazbaat se ji Darta hai

ahd-e-mazi ki koi baat na dohra ai dost

apne guzre hue lamhat se ji Darta hai

ab ke phir mujh se na ho rang-e-bahaaran mayus

apni be-rangi-e-jazbaat se ji Darta hai

ai falak mujh pe to ehsan bahut hain tere

han magar teri riwayat se ji Darta hai

bhar na den jazba-e-sada mein tamanna ka ye rang

apne rangin KHayalat se ji Darta hai

jam-o-mina pe bhi pahre hain zaban par bhi muhr

mohtasib teri isi baat se ji Darta hai

pahle ayyam basar hote the be-KHauf-o-KHatar

is zamane mein to din raat se ji Darta hai

kal tha raftar-e-jahan se na badalne ka gila

ab badalte hue haalat se ji Darta hai

chaunk uTThen na sulae hue jazbaat 'nasim'

kale baadal bhari barsat se ji Darta hai