ham-nawa ham-nafas ham-zaban aaina

ham-navā ham-nafas ham-zabāñ aa.ina

is liye merā tarz-e-bayāñ aa.ina

jā.eza apnā lete raho kyā patā

lā ke rakh de koī kab kahāñ aa.ina

sāf-goī meñ apnī misāl aap hai

mat samjhiye ki hai be-zabāñ aa.ina

chāhiye shauq se kaan bhar dījiye

mujh se hogā nahīñ bad-gumāñ aa.ina

lamha lamha tirī yaad meñ dam-ba-dam

le rahā der se hichkiyāñ aa.ina

haañ ba-fazl-e-ta.ālā haiñ 'parvāz' ke

zehn-o-dil aa.ina jism-o-jāñ aa.ina

ham-nawa ham-nafas ham-zaban aaina

is liye mera tarz-e-bayan aaina

jaeza apna lete raho kya pata

la ke rakh de koi kab kahan aaina

saf-goi mein apni misal aap hai

mat samjhiye ki hai be-zaban aaina

chahiye shauq se kan bhar dijiye

mujh se hoga nahin bad-guman aaina

lamha lamha teri yaad mein dam-ba-dam

le raha der se hichkiyan aaina

han ba-fazl-e-taala hain 'parwaz' ke

zehn-o-dil aaina jism-o-jaan aaina