humne kaTi hain teri yaad mein raaten aksar

ham ne kaaTī haiñ tirī yaad meñ rāteñ aksar

dil se guzrī haiñ sitāroñ kī barāteñ aksar

aur to kaun hai jo mujh ko tasallī detā

haath rakh detī haiñ dil par tirī bāteñ aksar

husn shā.ista-e-tahzīb-e-alam hai shāyad

ġham-zada lagtī haiñ kyuuñ chāñdnī rāteñ aksar

haal kahnā hai kisī se to muḳhātab hai koī

kitnī dilchasp huā kartī haiñ bāteñ aksar

ishq rahzan na sahī ishq ke hāthoñ phir bhī

ham ne luTtī huī dekhī haiñ barateñ aksar

ham se ik baar bhī jiitā hai na jītegā koī

vo to ham jaan ke khā lete haiñ māteñ aksar

un se pūchho kabhī chehre bhī paḌhe haiñ tum ne

jo kitāboñ kī kiyā karte haiñ bāteñ aksar

ham ne un tund-havāoñ meñ jalā.e haiñ charāġh

jin havāoñ ne ulaT dī haiñ bisāteñ aksar

hum ne kaTi hain teri yaad mein raaten aksar

dil se guzri hain sitaron ki baraaten aksar

aur to kaun hai jo mujh ko tasalli deta

hath rakh deti hain dil par teri baaten aksar

husn shaista-e-tahzib-e-alam hai shayad

gham-zada lagti hain kyun chandni raaten aksar

haal kahna hai kisi se to muKHatab hai koi

kitni dilchasp hua karti hain baaten aksar

ishq rahzan na sahi ishq ke hathon phir bhi

hum ne luTti hui dekhi hain baraten aksar

hum se ek bar bhi jita hai na jitega koi

wo to hum jaan ke kha lete hain maten aksar

un se puchho kabhi chehre bhi paDhe hain tum ne

jo kitabon ki kiya karte hain baaten aksar

hum ne un tund-hawaon mein jalae hain charagh

jin hawaon ne ulaT di hain bisaten aksar