humne kis raat nala sar na kiya

ham ne kis raat naala sar na kiyā

par use aah kuchh asar na kiyā

sab ke haañ tum hue karam-farmā

is taraf ko kabhū guzar na kiyā

kyuuñ bhaveñ tānte ho banda-navāz

siina kis vaqt maiñ sipar na kiyā

kitne bandoñ ko jaan se khoyā

kuchh ḳhudā kā bhī tū ne Dar na kiyā

dekhne ko rahe taraste ham

na kiyā rahm tū ne par na kiyā

aap se ham guzar ga.e kab ke

kyā hai zāhir meñ go safar na kiyā

kaun sā dil hai vo ki jis meñ aah

ḳhāna-ābād tū ne ghar na kiyā

tujh se zālim ke sāmne aayā

jaan kā maiñ ne kuchh ḳhatar na kiyā

sab ke jauhar nazar meñ aa.e 'dard'

be-hunar tū ne kuchh hunar na kiyā

hum ne kis raat nala sar na kiya

par use aah kuchh asar na kiya

sab ke han tum hue karam-farma

is taraf ko kabhu guzar na kiya

kyun bhawen tante ho banda-nawaz

sina kis waqt main sipar na kiya

kitne bandon ko jaan se khoya

kuchh KHuda ka bhi tu ne Dar na kiya

dekhne ko rahe taraste hum

na kiya rahm tu ne par na kiya

aap se hum guzar gae kab ke

kya hai zahir mein go safar na kiya

kaun sa dil hai wo ki jis mein aah

KHana-abaad tu ne ghar na kiya

tujh se zalim ke samne aaya

jaan ka main ne kuchh KHatar na kiya

sab ke jauhar nazar mein aae 'dard'

be-hunar tu ne kuchh hunar na kiya