humne sab kuchh luTa ke dekh liya

ham ne sab kuchh luTā ke dekh liyā

aap se dil lagā ke dekh liyā

dil kī buniyād ḳhud hilā Daalī

us ko nazreñ bachā ke dekh liyā

shāyad ab baat kuchh baḌhe aage

us ne bhī muskurā ke dekh liyā

mujh ko jin se vafā kī thī ummīd

un ko bhī aazmā ke dekh liyā

pattharoñ ne bhī sar nahīñ chūmā

us ke kūche meñ jā ke dekh liyā

barq kā ḳhauf kyoñ satātā hai

āshiyāna banā ke dekh liyā

kuchh dinoñ meñ chalan se bāhar thā

apnā sikka chalā ke dekh liyā

vajh-e-barakat hai rizq-e-pākīza

paak luqma uThā ke dekh liyā

phir bhī chhoTe rahe hazāroñ se

apne qad ko baḌhā ke dekh liyā

sar na jhuknā thā merā sar na jhukā

mujh ko suulī chaḌhā ke dekh liyā

hum ne sab kuchh luTa ke dekh liya

aap se dil laga ke dekh liya

dil ki buniyaad KHud hila Dali

us ko nazren bacha ke dekh liya

shayad ab baat kuchh baDhe aage

us ne bhi muskura ke dekh liya

mujh ko jin se wafa ki thi ummid

un ko bhi aazma ke dekh liya

pattharon ne bhi sar nahin chuma

us ke kuche mein ja ke dekh liya

barq ka KHauf kyon satata hai

aashiyana bana ke dekh liya

kuchh dinon mein chalan se bahar tha

apna sikka chala ke dekh liya

wajh-e-barakat hai rizq-e-pakiza

pak luqma uTha ke dekh liya

phir bhi chhoTe rahe hazaron se

apne qad ko baDha ke dekh liya

sar na jhukna tha mera sar na jhuka

mujh ko suli chaDha ke dekh liya