humne sau sau tarah banai baat

ham ne sau sau tarah banā.ī baat

sāmne us ke ban na aa.ī baat

sach to kahtā hai dost dushman hai

ham ne nāseh kī āzmā.ī baat

baat ke kāTne kā shikva kyā

ho jahāñ qat.a āshnā.ī baat

va.ade par us se kyuuñ qasam māñge

muft bigḌī banī banā.ī baat

ham ko dushman se ho ga.ī ma.alūm

dost ne ham se jo chhupā.ī baat

kyā shab-e-vasl ko ghaTānā hai

ġham hijrāñ kī kyuuñ baḌhā.ī baat

ye bhī un ke dahan kī ḳhūbī hai

ki samajh meñ mirī na aa.ī baat

shahr se kyuuñ kareñ vo azm-e-safar

ham-nashīñ tū ne kyā uḌaa.ī baat

vaañ se jā kar ḳhabar nahīñ laayā

hai kahīñ kī sunī sunā.ī baat

bhed apnoñ se bhī na kah 'nāzim'

muñh se niklī huī parā.ī baat

hum ne sau sau tarah banai baat

samne us ke ban na aai baat

sach to kahta hai dost dushman hai

hum ne naseh ki aazmai baat

baat ke kaTne ka shikwa kya

ho jahan qata aashnai baat

wade par us se kyun qasam mange

muft bigDi bani banai baat

hum ko dushman se ho gai malum

dost ne hum se jo chhupai baat

kya shab-e-wasl ko ghaTana hai

gham hijran ki kyun baDhai baat

ye bhi un ke dahan ki KHubi hai

ki samajh mein meri na aai baat

shahr se kyun karen wo azm-e-safar

ham-nashin tu ne kya uDai baat

wan se ja kar KHabar nahin laya

hai kahin ki suni sunai baat

bhed apnon se bhi na kah 'nazim'

munh se nikli hui parai baat