humne teri KHatir se dil-e-zar bhi chhoDa

ham ne tirī ḳhātir se dil-e-zār bhī chhoḌā

tū bhī na huā yaar aur ik yaar bhī chhoḌā

kyā hogā rafūgar se rafū merā garebān

ai dast-e-junūñ tū ne nahīñ taar bhī chhoḌā

diiñ de ke gayā kufr ke bhī kaam se āshiq

tasbīh ke saath us ne to zunnār bhī chhoḌā

goshe meñ tirī chashm-e-siyah-mast ke dil ne

kī jab se jagah ḳhāna-e-ḳhummār bhī chhoḌā

is se hai ġharīboñ ko tasallī ki ajal ne

muflis ko jo maarā to na zardār bhī chhoḌā

TeḌhe na ho ham se rakho iḳhlās to sīdhā

tum pyaar se rukte ho to lo pyaar bhī chhoḌā

kyā chhoḌeñ asīrān-e-mohabbat ko vo jis ne

sadqe meñ na ik murġh-e-giraftār bhī chhoḌā

pahuñchī mirī rusvā.ī kī kyūñkar ḳhabar us ko

us shoḳh ne to dekhnā aḳhbār bhī chhoḌā

kartā thā jo yaañ aane kā jhūTā kabhī iqrār

muddat se 'zafar' us ne vo iqrār bhī chhoḌā

hum ne teri KHatir se dil-e-zar bhi chhoDa

tu bhi na hua yar aur ek yar bhi chhoDa

kya hoga rafugar se rafu mera gareban

ai dast-e-junun tu ne nahin tar bhi chhoDa

din de ke gaya kufr ke bhi kaam se aashiq

tasbih ke sath us ne to zunnar bhi chhoDa

goshe mein teri chashm-e-siyah-mast ke dil ne

ki jab se jagah KHana-e-KHummar bhi chhoDa

is se hai gharibon ko tasalli ki ajal ne

muflis ko jo mara to na zardar bhi chhoDa

TeDhe na ho hum se rakho iKHlas to sidha

tum pyar se rukte ho to lo pyar bhi chhoDa

kya chhoDen asiran-e-mohabbat ko wo jis ne

sadqe mein na ek murgh-e-giraftar bhi chhoDa

pahunchi meri ruswai ki kyunkar KHabar us ko

us shoKH ne to dekhna aKHbar bhi chhoDa

karta tha jo yan aane ka jhuTa kabhi iqrar

muddat se 'zafar' us ne wo iqrar bhi chhoDa