hum pe rakhe gae ilzam na jaane kya kya

ham pe rakhe ga.e ilzām na jaane kyā kyā

ban ga.e ek mohabbat ke fasāne kyā kyā

manzil-e-dār-o-rasan qaid-e-sitam dasht-e-balā

paa.e haiñ ahl-e-mohabbat ne Thikāne kyā kyā

koī andāz-e-nadāmat koī naala koī ashk

DhūñDe haiñ chashm-e-karam tū ne bahāne kyā kyā

kabhī āñdhī kabhī tūfāñ kabhī sho.ale kabhī barq

mere gulshan pe bhī guzre haiñ zamāne kyā kyā

daulat sabr-o-sukūñ gauhar-e-ashk-e-rañgīñ

ham ne ġhurbat meñ luTā.e haiñ ḳhazāne kyā kyā

nazar-e-ahl-e-mohabbat hī samajh saktī hai

lab-e-ḳhāmosh pe hote haiñ fasāne kyā kyā

ab mire sāmne jab koī gale miltā hai

khiñch ke aa jaate haiñ āñkhoñ meñ zamāne kyā kiyā

kabhī kaliyoñ kā tabassum kabhī tāroñ kī chamak

dil taḌapne ke bhī hote haiñ bahāne kyā kyā

kabhī halkā sā tabassum kabhī chīñpī sī nazar

ham se pūchho ki lage dil pe nishāne kyā kyā

ham ḳhatā-kār-e-mohabbat haiñ ye ham se pūchho

husn-e-ma.asūm ko aate haiñ bahāne kyā kyā

an-ginat roz ḳhayāloñ ke mahal bante haiñ

sochtā hai dil-e-betāb na jaane kyā kyā

koī 'shārib' koī 'mullā' koī 'ġhālib' koī 'mīr'

manzil-e-'ishq se guzre haiñ divāne kyā kyā

hum pe rakhe gae ilzam na jaane kya kya

ban gae ek mohabbat ke fasane kya kya

manzil-e-dar-o-rasan qaid-e-sitam dasht-e-bala

pae hain ahl-e-mohabbat ne Thikane kya kya

koi andaz-e-nadamat koi nala koi ashk

DhunDe hain chashm-e-karam tu ne bahane kya kya

kabhi aandhi kabhi tufan kabhi shoale kabhi barq

mere gulshan pe bhi guzre hain zamane kya kya

daulat sabr-o-sukun gauhar-e-ashk-e-rangin

hum ne ghurbat mein luTae hain KHazane kya kya

nazar-e-ahl-e-mohabbat hi samajh sakti hai

lab-e-KHamosh pe hote hain fasane kya kya

ab mere samne jab koi gale milta hai

khinch ke aa jate hain aankhon mein zamane kya kiya

kabhi kaliyon ka tabassum kabhi taron ki chamak

dil taDapne ke bhi hote hain bahane kya kya

kabhi halka sa tabassum kabhi chinpi si nazar

hum se puchho ki lage dil pe nishane kya kya

hum KHata-kar-e-mohabbat hain ye hum se puchho

husn-e-masum ko aate hain bahane kya kya

an-ginat roz KHayalon ke mahal bante hain

sochta hai dil-e-betab na jaane kya kya

koi 'shaarib' koi 'mulla' koi 'ghaalib' koi 'mir'

manzil-e-'ishq se guzre hain diwane kya kya