ham-sae mein shaitan bhi rahta hai KHuda bhi

ham-sā.e meñ shaitān bhī rahtā hai ḳhudā bhī

jannat bhī mayassar hai jahannam kī havā bhī

ye shahr to lagtā hai kabāḌī kī dukāñ hai

khoTā bhī isī mol meñ biktā hai kharā bhī

is jism ko bhī chaaT ga.ī saañs kī dīmak

maiñ ne use dekhā thā kisī vaqt harā bhī

jaise kabhī pahle bhī maiñ guzrā huuñ yahāñ se

mānūs hai is rah se mirī laġhzish-e-pā bhī

is dasht ko pahchān rahī haiñ mirī āñkheñ

dekhā huā lagtā hai ye an-dekhā huā bhī

tum bhī to kisī baat pe raazī nahīñ hote

tabdīl nahīñ hotā muqaddar kā likhā bhī

ab faisla-kun moḌ pe aa pahuñchā mirā ishq

dariyā bhī hai maujūd yahāñ kachchā ghaḌā bhī

mumkin hai meñ is baar bhaTak jā.ūñ safar meñ

is baar mire saath havā bhī hai diyā bhī

ye shahr farishtoñ se bharā rahtā hai 'āmī'

is shahr pe ik ḳhaas ināyat hai sazā bhī

ham-sae mein shaitan bhi rahta hai KHuda bhi

jannat bhi mayassar hai jahannam ki hawa bhi

ye shahr to lagta hai kabaDi ki dukan hai

khoTa bhi isi mol mein bikta hai khara bhi

is jism ko bhi chaT gai sans ki dimak

main ne use dekha tha kisi waqt hara bhi

jaise kabhi pahle bhi main guzra hun yahan se

manus hai is rah se meri laghzish-e-pa bhi

is dasht ko pahchan rahi hain meri aankhen

dekha hua lagta hai ye an-dekha hua bhi

tum bhi to kisi baat pe raazi nahin hote

tabdil nahin hota muqaddar ka likha bhi

ab faisla-kun moD pe aa pahuncha mera ishq

dariya bhi hai maujud yahan kachcha ghaDa bhi

mumkin hai mein is bar bhaTak jaun safar mein

is bar mere sath hawa bhi hai diya bhi

ye shahr farishton se bhara rahta hai 'ami'

is shahr pe ek KHas inayat hai saza bhi