humse do-chaar bazm mein dhyan aur ki taraf

ham se do-chār bazm meñ dhyān aur kī taraf

aañkh is taraf lagā.ī hai kaan aur kī taraf

abrū se ham shahīd mizha se raqīb huuñ

talvār idhar lagā.iye baan aur kī taraf

said-e-zabūñ vo huuñ jo ravāñ tiir idhar huā

us kī qazā ne bolī kamān aur kī taraf

ham bekasoñ kī qabr sivā hargiz ai falak

nam-gīr ko na abr ke taan aur kī taraf

yārab kare jo husn kī ḳhairāt vo sanam

mere sivā kare nahīñ daan aur kī taraf

utre na kis tarah mirī āñkhoñ meñ ḳhuun 'shād'

detā mujhe dikhā ke hai paan aur kī taraf

hum se do-chaar bazm mein dhyan aur ki taraf

aankh is taraf lagai hai kan aur ki taraf

abru se hum shahid mizha se raqib hun

talwar idhar lagaiye ban aur ki taraf

said-e-zabun wo hun jo rawan tir idhar hua

us ki qaza ne boli kaman aur ki taraf

hum bekason ki qabr siwa hargiz ai falak

nam-gir ko na abr ke tan aur ki taraf

yarab kare jo husn ki KHairaat wo sanam

mere siwa kare nahin dan aur ki taraf

utre na kis tarah meri aankhon mein KHun 'shad'

deta mujhe dikha ke hai pan aur ki taraf