humse kuchh aage zamane mein hua kya kya kuchh

ham se kuchh aage zamāne meñ huā kyā kyā kuchh

to bhī ham ġhāfiloñ ne aa ke kyā kyā kuchh

dil jigar jaan ye bhasmant hue siine meñ

ghar ko ātish dī mohabbat ne jalā kyā kyā kuchh

kyā kahūñ tujh se ki kyā dekhā hai tujh meñ maiñ ne

ishva-o-ġhamza-o-andāz-o-adā kyā kyā kuchh

dil gayā hosh gayā sabr gayā jī bhī gayā

shaġhl meñ ġham ke tire ham se gayā kyā kyā kuchh

aah mat pūchh sitamgār ki tujh se thī hameñ

chashm-e-lutf-o-karam-o-mahr-o-vafā kyā kyā kuchh

naam haiñ ḳhasta-o-āvāra-o-bad-nām mire

ek 'ālam ne ġharaz mujh ko kahā kyā kyā kuchh

tarfa-e-sohbat hai ki suntā nahīñ tū ek mirī

vāste tere sunā maiñ ne sunā kyā kyā kuchh

hasrat-e-vasl-o-ġham-e-hijr-o-ḳhayāl-e-ruḳh-e-dost

mar gayā maiñ pe mire jī meñ rahā kyā kyā kuchh

dard-e-dil zaḳhm-e-jigar kulfat-e-ġham dāġh-e-firāq

aah 'ālam se mire saath chalā kyā kyā kuchh

chashm-e-namnāk o dil-e-pur jigar-e-sad-pāra

daulat-e-ishq se ham paas bhī thā kyā kyā kuchh

tujh ko kyā banñe bigaḌne se zamāne ke ki yaañ

ḳhaak kin kin kī huī sirf banā kyā kyā kuchh

qibla-o-kā'ba ḳhudā-vand-o-malāz-o-mushfiq

muztarib ho ke use maiñ ne likhā kyā kyā kuchh

par kahūñ kyā raqam shauq kī apne tāsīr

har sar-e-harf pe vo kahne lagā kyā kyā kuchh

ek mahrūm chale 'mīr' hameñ 'ālam se

varna 'ālam ko zamāne ne diyā kyā kyā kuchh

hum se kuchh aage zamane mein hua kya kya kuchh

to bhi hum ghafilon ne aa ke kya kya kuchh

dil jigar jaan ye bhasmant hue sine mein

ghar ko aatish di mohabbat ne jala kya kya kuchh

kya kahun tujh se ki kya dekha hai tujh mein main ne

ishwa-o-ghamza-o-andaz-o-ada kya kya kuchh

dil gaya hosh gaya sabr gaya ji bhi gaya

shaghl mein gham ke tere hum se gaya kya kya kuchh

aah mat puchh sitamgar ki tujh se thi hamein

chashm-e-lutf-o-karam-o-mahr-o-wafa kya kya kuchh

nam hain KHasta-o-awara-o-bad-nam mere

ek 'alam ne gharaz mujh ko kaha kya kya kuchh

tarfa-e-sohbat hai ki sunta nahin tu ek meri

waste tere suna main ne suna kya kya kuchh

hasrat-e-wasl-o-gham-e-hijr-o-KHayal-e-ruKH-e-dost

mar gaya main pe mere ji mein raha kya kya kuchh

dard-e-dil zaKHm-e-jigar kulfat-e-gham dagh-e-firaq

aah 'alam se mere sath chala kya kya kuchh

chashm-e-namnak o dil-e-pur jigar-e-sad-para

daulat-e-ishq se hum pas bhi tha kya kya kuchh

tujh ko kya banne bigaDne se zamane ke ki yan

KHak kin kin ki hui sirf bana kya kya kuchh

qibla-o-ka'ba KHuda-wand-o-malaz-o-mushfiq

muztarib ho ke use main ne likha kya kya kuchh

par kahun kya raqam shauq ki apne tasir

har sar-e-harf pe wo kahne laga kya kya kuchh

ek mahrum chale 'mir' hamein 'alam se

warna 'alam ko zamane ne diya kya kya kuchh