humse to kisi kaam ki buniyaad na howe

ham se to kisī kaam kī buniyād na hove

jab tak ki udhar hī se kuchh imdād na hove

ham ko bhī nahīñ chain tire ġhamzoñ se dilbar

jab tak ki nayā ik sitam ījād na hove

ai aah zarā uThiyo to āhista ki vo jo

thoḌā sā asar hai kahīñ barbād na hove

dī thī ye duā kis ne mire dil ko ilāhī

ujḌe ye ghar aisā ki phir ābād na hove

dekhā na kisī vaqt maiñ hañste hue us ko

ye bhī koī dil hai jo kabhī shaad na hove

bhūle se bhī bhūlo na kabhī ġhairoñ kā tum naam

aur naam hamārā hī tumheñ yaad na hove

kyuuñ dekho ho us kā qad-o-rū bulbul-o-qumrī

kyā samjhe ho tum ye gul-o-shamshād na hove

mar jaa.eñ qafas meñ yuuñ hī ham aah taḌap kar

itnī jo ḳhabar lene ko sayyād na hove

dil jal ke jahāñ surma huā qais kā ab tak

us jā pe jaras pahuñche to fariyād na hove

mere liye qātil bhī agar hove to hove

par ġhair ke haq meñ to vo jallād na hove

vārasta jo ho qaid se hastī ke to behtar

par daam se tere 'hasan' āzād na hove

hum se to kisi kaam ki buniyaad na howe

jab tak ki udhar hi se kuchh imdad na howe

hum ko bhi nahin chain tere ghamzon se dilbar

jab tak ki naya ek sitam ijad na howe

ai aah zara uThiyo to aahista ki wo jo

thoDa sa asar hai kahin barbaad na howe

di thi ye dua kis ne mere dil ko ilahi

ujDe ye ghar aisa ki phir aabaad na howe

dekha na kisi waqt main hanste hue us ko

ye bhi koi dil hai jo kabhi shad na howe

bhule se bhi bhulo na kabhi ghairon ka tum nam

aur nam hamara hi tumhein yaad na howe

kyun dekho ho us ka qad-o-ru bulbul-o-qumri

kya samjhe ho tum ye gul-o-shamshad na howe

mar jaen qafas mein yun hi hum aah taDap kar

itni jo KHabar lene ko sayyaad na howe

dil jal ke jahan surma hua qais ka ab tak

us ja pe jaras pahunche to fariyaad na howe

mere liye qatil bhi agar howe to howe

par ghair ke haq mein to wo jallad na howe

warasta jo ho qaid se hasti ke to behtar

par dam se tere 'hasan' aazad na howe