hum shahr mein ek sham ki KHatir hue barbaad

ham shahr meñ ik sham' kī ḳhātir hue barbād

logoñ ne kiyā chāñd ke sahrāoñ ko ābād

har samt falak-bos pahāḌoñ kī qatāreñ

'ḳhusrav' hai na 'shīrīñ' hai na tesha hai na farhād

barsoñ se yahī ḳhvāb haiñ nīñdoñ kī sajāvaT

gulshan hai magar gul hai na bulbul hai na sayyād

huuñ tā.ir-e-be-bām charāġh-e-sar-e-sahrā

ummīd-e-karam hai na mujhe shikva-e-bedād

jis ghar ko basāyā thā mirī be-ḳhabarī ne

aaj us ko tirī ḳhud-nigarī kar ga.ī barbād

kuchh aisā dhuāñ hai ki ghuTTī jaatī haiñ sāñseñ

is raat ke baa'd aaoge shāyad na kabhī yaad

har zarra hai madfan mirī hairat-nigahī kā

yārab! ye galī kūche hamesha raheñ ābād

kal apnī bhī tasvīr na pahchān sakeñge

is daur ko baḳhshe ga.e vo 'mānī' vo 'bahzād'

sunsān hai zindāñ bhī bisān-e-dil-e-shā.er

ne shor-e-salāsil hai na hañgāma-e-fariyād

ḳhurshīd-e-qayāmat utar aa.e rag-e-jāñ meñ

ai naġhmagaro aisī koī tarz ho ījād

'shohrat' ki hai ab vaj.h-e-pareshānī-e-ahbāb

uTh jā.egā jis roz tū aa.egā bahut yaad

hum shahr mein ek sham' ki KHatir hue barbaad

logon ne kiya chand ke sahraon ko aabaad

har samt falak-bos pahaDon ki qataren

'KHusraw' hai na 'shirin' hai na tesha hai na farhad

barson se yahi KHwab hain nindon ki sajawaT

gulshan hai magar gul hai na bulbul hai na sayyaad

hun tair-e-be-baam charagh-e-sar-e-sahra

ummid-e-karam hai na mujhe shikwa-e-bedad

jis ghar ko basaya tha meri be-KHabari ne

aaj us ko teri KHud-nigari kar gai barbaad

kuchh aisa dhuan hai ki ghuTTi jati hain sansen

is raat ke ba'd aaoge shayad na kabhi yaad

har zarra hai madfan meri hairat-nigahi ka

yarab! ye gali kuche hamesha rahen aabaad

kal apni bhi taswir na pahchan sakenge

is daur ko baKHshe gae wo 'mani' wo 'bahzad'

sunsan hai zindan bhi bisan-e-dil-e-shaer

ne shor-e-salasil hai na hangama-e-fariyaad

KHurshid-e-qayamat utar aae rag-e-jaan mein

ai naghmagaro aisi koi tarz ho ijad

'shohrat' ki hai ab wajh-e-pareshani-e-ahbab

uTh jaega jis roz tu aaega bahut yaad