hum tark-e-talluq ka gila bhi nahin karte

ham tark-e-ta.alluq kā gilā bhī nahīñ karte

tum itne ḳhafā ho ki jafā bhī nahīñ karte

tum shauq se elān-e-jafā par raho nāzāñ

ham jur.at-e-iz.hār-e-vafā bhī nahīñ karte

maanā ki hañsī bhī hai adā aap kī lekin

itnā kisī bekas pe hañsā bhī nahīñ karte

ham jur.at-e-guftār ke qaa.il to haiñ lekin

har baat sar-e-bazm kahā bhī nahīñ karte

har haal meñ maqsad hai safar mahv-e-safar haiñ

nākāmi-e-paiham kā gilā bhī nahīñ karte

muddat se hai ḳhāmosh fazā dār-o-rasan kī

ab jurm-e-vafā ahl-e-vafā bhī nahīñ karte

kyā jāniye kis rañg meñ hai shams 'zubairī'

but ek taraf zikr-e-ḳhudā bhī nahīñ karte

hum tark-e-talluq ka gila bhi nahin karte

tum itne KHafa ho ki jafa bhi nahin karte

tum shauq se elan-e-jafa par raho nazan

hum jurat-e-izhaar-e-wafa bhi nahin karte

mana ki hansi bhi hai ada aap ki lekin

itna kisi bekas pe hansa bhi nahin karte

hum jurat-e-guftar ke qail to hain lekin

har baat sar-e-bazm kaha bhi nahin karte

har haal mein maqsad hai safar mahw-e-safar hain

nakaami-e-paiham ka gila bhi nahin karte

muddat se hai KHamosh faza dar-o-rasan ki

ab jurm-e-wafa ahl-e-wafa bhi nahin karte

kya jaaniye kis rang mein hai shams 'zubairi'

but ek taraf zikr-e-KHuda bhi nahin karte