hum tere ishq pe maghrur na ho jaen kahin

ham tire ishq pe maġhrūr na ho jaa.eñ kahīñ

is qadar paas na aa duur na ho jaa.eñ kahīñ

hameñ ā.īna banā le ki ye sāhir āñkheñ

apne hī sehr se mas.hūr na ho jaa.eñ kahīñ

siina tābūt na ban jaa.e kisī bulbul kā

ḳhushbueñ baaġh kī kāfūr na ho jaa.eñ kahīñ

mat hañsā is qadar ai naubat-e-hālāt hameñ

jo faqat zaḳhm haiñ nāsūr na ho jaa.eñ kahīñ

dhaḌkaneñ kyā haiñ bas ik raakh meñ larzish sī hai

phir vahī jalve sar-e-tūr na ho jaa.eñ kahīñ

jugnuoñ ko to biThā letī hai āñkhoñ pe havā

diye Darte haiñ ki be-nūr na ho jaa.eñ kahīñ

zarre zarre meñ to vo ḳhud hai makīñ varna ham

chhup na jaa.eñ kahīñ mafrūr na ho jaa.eñ kahīñ

āzmā.ish meñ na Daal apne laboñ ko mat bol

furqateñ bhī hameñ manzūr na ho jaa.eñ kahīñ

ham to āshiq haiñ hamārā to chalo kaam sahī

sajde is shahr kā dastūr na ho jaa.eñ kahīñ

aap ke ishq meñ ham ho to ga.e aap hī aap

aap ke naam se mash.hūr na ho jaa.eñ kahīñ

ishq ko hazrat-e-'rāhīl' samajhte to haiñ jabr

qibla-o-ka.aba bhī majbūr na ho jaa.eñ kahīñ

hum tere ishq pe maghrur na ho jaen kahin

is qadar pas na aa dur na ho jaen kahin

hamein aaina bana le ki ye sahir aankhen

apne hi sehr se mashur na ho jaen kahin

sina tabut na ban jae kisi bulbul ka

KHushbuen bagh ki kafur na ho jaen kahin

mat hansa is qadar ai naubat-e-haalat hamein

jo faqat zaKHm hain nasur na ho jaen kahin

dhaDkanen kya hain bas ek rakh mein larzish si hai

phir wahi jalwe sar-e-tur na ho jaen kahin

jugnuon ko to biTha leti hai aankhon pe hawa

diye Darte hain ki be-nur na ho jaen kahin

zarre zarre mein to wo KHud hai makin warna hum

chhup na jaen kahin mafrur na ho jaen kahin

aazmaish mein na Dal apne labon ko mat bol

furqaten bhi hamein manzur na ho jaen kahin

hum to aashiq hain hamara to chalo kaam sahi

sajde is shahr ka dastur na ho jaen kahin

aap ke ishq mein hum ho to gae aap hi aap

aap ke nam se mashhur na ho jaen kahin

ishq ko hazrat-e-'rahil' samajhte to hain jabr

qibla-o-kaba bhi majbur na ho jaen kahin