hum to bas ek uqda the hal hone tak

ham to bas ik uqda the hal hone tak

zanjīroñ meñ band the pāgal hone tak

ishq agar hai diin to phir ho jā.eñge

ham bhī murtad is ke mukammal hone tak

maiñ paanī thā sūraj ghuur rahā thā mujhe

kyā kartā be-bas thā bādal hone tak

ab to ḳhair sarāb sī ḳhuub chamaktī hai

aañkh thī dariyā shahr ke jañgal hone tak

mujh meñ bhī thī tez sī ḳhushbū ma.anī kī

mahak rahā thā maiñ bhī mohmal hone tak

ab vo merī aañkh pe īmāñ laayā hai

dasht hī thā ye dil bhī jal-thal hone tak

jhiil kabhī tālāb kabhī dariyā thā kabhī

mere kyā kyā ruup the daldal hone tak

hum to bas ek uqda the hal hone tak

zanjiron mein band the pagal hone tak

ishq agar hai din to phir ho jaenge

hum bhi murtad is ke mukammal hone tak

main pani tha suraj ghur raha tha mujhe

kya karta be-bas tha baadal hone tak

ab to KHair sarab si KHub chamakti hai

aankh thi dariya shahr ke jangal hone tak

mujh mein bhi thi tez si KHushbu mani ki

mahak raha tha main bhi mohmal hone tak

ab wo meri aankh pe iman laya hai

dasht hi tha ye dil bhi jal-thal hone tak

jhil kabhi talab kabhi dariya tha kabhi

mere kya kya rup the daldal hone tak