hum to duniya se bad-guman Thahre

ham to duniyā se bad-gumāñ Thahre

aage dil kī ḳhushī jahāñ Thahre

haa.e vo qāfile jo luT kar bhī

zer-e-dīvār-e-gulsitāñ Thahre

aap ko kārvāñ se kyā matlab

aap to mīr-e-kārvāñ Thahre

zindagī chāhtī hai hangāma

aur ham log be-zabāñ Thahre

kabhī terī talāsh meñ nikle

kabhī ban kar tirā nishāñ Thahre

gardish-e-dahr saath saath rahī

ham jidhar bhī ga.e jahāñ Thahre

har qadam par thā ik sanam-ḳhāna

kyā batā.eñ kahāñ kahāñ Thahre

kuchh to kaj-rau jahāñ bhī hai 'bāqī'

aur kuchh ham bhī qissa-ḳhvāñ Thahre

hum to duniya se bad-guman Thahre

aage dil ki KHushi jahan Thahre

hae wo qafile jo luT kar bhi

zer-e-diwar-e-gulsitan Thahre

aap ko karwan se kya matlab

aap to mir-e-karwan Thahre

zindagi chahti hai hangama

aur hum log be-zaban Thahre

kabhi teri talash mein nikle

kabhi ban kar tera nishan Thahre

gardish-e-dahr sath sath rahi

hum jidhar bhi gae jahan Thahre

har qadam par tha ek sanam-KHana

kya bataen kahan kahan Thahre

kuchh to kaj-rau jahan bhi hai 'baqi'

aur kuchh hum bhi qissa-KHwan Thahre