hum to yan marte hain wan usko KHabar kuchh bhi nahin

ham to yaañ marte haiñ vaañ us ko ḳhabar kuchh bhī nahīñ

ai vo sab kuchh hī sahī ishq magar kuchh bhī nahīñ

tum ko fariyād-e-sitam-kash kā ḳhatar kuchh bhī nahīñ

kuchh to ulfat kā asar hai ki asar kuchh bhī nahīñ

āfiyat ek aur āzār hazāroñ us meñ

jis ko kuchh suud nahīñ us ko zarar kuchh bhī nahīñ

ḳhalvat-e-rāz meñ kyā kaam hai hañgāme kā

hai ḳhabar-dār vahī jis ko ḳhabar kuchh bhī nahīñ

tū aur ik shaan ki aalam kī nazar meñ kyā kuchh

maiñ aur ik jaan ki phirte hī nazar kuchh bhī nahīñ

rahm hai us kā hī āshob-e-qayāmat kī dalīl

jis se bezār hai vo us ko ḳhatar kuchh bhī nahīñ

ham ko is hausle pe kyuuñ ki falak de sāmāñ

shikva-e-bār hai aur minnat-e-sar kuchh bhī nahīñ

rāhi-e-mulk-e-adam haiñ nahīñ fikr-e-manzil

qasd rakhte haiñ udhar kā ki jidhar kuchh bhī nahīñ

ziist afsūn-e-tamāshā hai tavahhum ke liye

hotī hai jalva-numā misl-e-sharar kuchh bhī nahīñ

ḳhud-parastī ke sabab shaiḳh-o-barahman ko hai ḳhabt

sab idhar hī kī banāvaT hai udhar kuchh bhī nahīñ

āqibat-bīñ ko hai har bazm kī shādī mātam

sham.a rotī hai ki hote hī sahar kuchh bhī nahīñ

roz-e-furqat kī darāzī se na dekhe shab-e-hijr

hasrat-e-shām meñ tashvīsh-e-sahar kuchh bhī nahīñ

jānte haiñ ki na bhaTkegā jahāñ kyā kyā kuchh

dekhte haiñ ki unheñ madd-e-nazar kuchh bhī nahīñ

ai 'qalaq' piite hī masjid meñ chale aate ho

be-ḳhabar kitne ho tum bhī ki ḳhabar kuchh bhī nahīñ

hum to yan marte hain wan us ko KHabar kuchh bhi nahin

ai wo sab kuchh hi sahi ishq magar kuchh bhi nahin

tum ko fariyaad-e-sitam-kash ka KHatar kuchh bhi nahin

kuchh to ulfat ka asar hai ki asar kuchh bhi nahin

aafiyat ek aur aazar hazaron us mein

jis ko kuchh sud nahin us ko zarar kuchh bhi nahin

KHalwat-e-raaz mein kya kaam hai hangame ka

hai KHabar-dar wahi jis ko KHabar kuchh bhi nahin

tu aur ek shan ki aalam ki nazar mein kya kuchh

main aur ek jaan ki phirte hi nazar kuchh bhi nahin

rahm hai us ka hi aashob-e-qayamat ki dalil

jis se bezar hai wo us ko KHatar kuchh bhi nahin

hum ko is hausle pe kyun ki falak de saman

shikwa-e-bar hai aur minnat-e-sar kuchh bhi nahin

rahi-e-mulk-e-adam hain nahin fikr-e-manzil

qasd rakhte hain udhar ka ki jidhar kuchh bhi nahin

zist afsun-e-tamasha hai tawahhum ke liye

hoti hai jalwa-numa misl-e-sharar kuchh bhi nahin

KHud-parasti ke sabab shaiKH-o-barahman ko hai KHabt

sab idhar hi ki banawaT hai udhar kuchh bhi nahin

aaqibat-bin ko hai har bazm ki shadi matam

shama roti hai ki hote hi sahar kuchh bhi nahin

roz-e-furqat ki daraazi se na dekhe shab-e-hijr

hasrat-e-sham mein tashwish-e-sahar kuchh bhi nahin

jaante hain ki na bhaTkega jahan kya kya kuchh

dekhte hain ki unhen madd-e-nazar kuchh bhi nahin

ai 'qalaq' pite hi masjid mein chale aate ho

be-KHabar kitne ho tum bhi ki KHabar kuchh bhi nahin