hum un ke gham mein taDap rahe hain jo ghair se dil laga chuke hain

ham un ke ġham meñ taḌap rahe haiñ jo ġhair se dil lagā chuke haiñ

hamāre dil meñ hai yaad un kī jo ham ko dil se bhulā chuke haiñ

balā-e-mahshar bhī sahal un ko azāb-e-dozaḳh bhī un ko āsāñ

jo terī ulfat meñ apne dil par ġham-e-judā.ī uThā chuke haiñ

adū se jā kar karo ye bāteñ vahīñ guzāro tum apnī rāteñ

tumhārī bātoñ meñ aa chuke ham tumheñ bahut aazmā chuke haiñ

agar na aa.eñ nazar na aa.eñ nahīñ hai kuchh bhī ḳhayāl is kā

kahāñ vo jā.eñge muñh chhupā kar hamāre dil meñ jab aa chuke haiñ

ye kyā qayāmat hai yā ilāhī ki un kī aamad kā haal sun kar

shakeb-o-sabr-o-qarār hosh-o-havās pahle hī jā chuke haiñ

ḳhayāl kuchh bhī nahīñ hai tujh ko but-e-parīvash hamārā ham to

tirī mohabbat meñ naqd-e-jān-o-dil-o-jigar bhī luTā chuke haiñ

butoñ ko denā na bhuul kar dil na un pe honā zarā bhī maa.il

nahīñ hai juz rañj un se hāsil tujhe ye 'nādir' jatā chuke haiñ

hum un ke gham mein taDap rahe hain jo ghair se dil laga chuke hain

hamare dil mein hai yaad un ki jo hum ko dil se bhula chuke hain

bala-e-mahshar bhi sahal un ko azab-e-dozaKH bhi un ko aasan

jo teri ulfat mein apne dil par gham-e-judai uTha chuke hain

adu se ja kar karo ye baaten wahin guzaro tum apni raaten

tumhaari baaton mein aa chuke hum tumhein bahut aazma chuke hain

agar na aaen nazar na aaen nahin hai kuchh bhi KHayal is ka

kahan wo jaenge munh chhupa kar hamare dil mein jab aa chuke hain

ye kya qayamat hai ya ilahi ki un ki aamad ka haal sun kar

shakeb-o-sabr-o-qarar hosh-o-hawas pahle hi ja chuke hain

KHayal kuchh bhi nahin hai tujh ko but-e-pariwash hamara hum to

teri mohabbat mein naqd-e-jaan-o-dil-o-jigar bhi luTa chuke hain

buton ko dena na bhul kar dil na un pe hona zara bhi mail

nahin hai juz ranj un se hasil tujhe ye 'nadir' jata chuke hain