hama-girya silk-e-shabnam hama-ashk bazm-e-anjum

hama-girya silk-e-shabnam hama-ashk bazm-e-anjum

jo na gul bhī muskurā.e to kahāñ rahe tabassum

na ḳhatā mirī nazar kī na gunah tire karam kā

ki nasīb-e-āshiqāñ hai ye shikast-e-be-tasādum

thī bharī bahār lekin gul-o-bū-e-gul ne samjhā

nigah-e-chaman se chhup kar jo kabhī mile haiñ ham tum

kahīñ barq jagmagā.ī kahīñ phuul muskurā.e

jo tire laboñ ko chhūkar huā muntashir tabassum

koī raah hai mohabbat to hujūm hai javānī

kahīñ paañv Dagmagā.e kahīñ zindagī huī gum

jise ġham se kuchh milā hai vahī ham-nafas hai merā

jo shikasta sāz-e-dil ho to suno mirā tarannum

ye samajh lo zindagī hai safar-e-hazār-jāda

ġham-e-kārvāñ se chhūTe to 'nushūr' kho ga.e tum

hama-girya silk-e-shabnam hama-ashk bazm-e-anjum

jo na gul bhi muskurae to kahan rahe tabassum

na KHata meri nazar ki na gunah tere karam ka

ki nasib-e-ashiqan hai ye shikast-e-be-tasadum

thi bhari bahaar lekin gul-o-bu-e-gul ne samjha

nigah-e-chaman se chhup kar jo kabhi mile hain hum tum

kahin barq jagmagai kahin phul muskurae

jo tere labon ko chhukar hua muntashir tabassum

koi rah hai mohabbat to hujum hai jawani

kahin panw Dagmagae kahin zindagi hui gum

jise gham se kuchh mila hai wahi ham-nafas hai mera

jo shikasta saz-e-dil ho to suno mera tarannum

ye samajh lo zindagi hai safar-e-hazar-jada

gham-e-karwan se chhuTe to 'nushur' kho gae tum