hama-tan jalwa-fishan mah-o-charaghan ki tarah

hama-tan jalvā-fishāñ māh-o-charāġhāñ kī tarah

kaun aayā dil-e-pur-shauq meñ mehmāñ kī tarah

guuñj uThī ġham-kada-e-rūh meñ us kī āvāz

ḳhvāb meñ bahte hue chashma-e-irfāñ kī tarah

zehn-e-fankār meñ mānind-e-shu.ūr-e-naġhma

safha-e-dil pe hai vo nazm ke unvāñ kī tarah

zau-fishāñ mere sanam-ḳhāna-e-afkār meñ hai

lab-e-ma.asūm koī la.al-e-badaḳhshāñ kī tarah

ahrman ban ke ta.āqub meñ rahī zulmat-e-shab

chhup gayā koī mirī ruuh meñ yazdāñ kī tarah

barhana-pā-o-sarāsīma thī tauqīr-e-bashar

vo mire saath rahā azmat-e-insāñ kī tarah

mizha ālūda-ba-ḳhūñ chashm-e-tamannā ḳhūñ-bār

sīna-e-dahr meñ huuñ zaḳhm-e-numāyāñ kī tarah

ai mire ham-dam-e-dil-gīr duā de mujh ko

us ke qadmoñ pe rahūñ shāḳh-e-gul-afshāñ kī tarah

jal uThī sham-e-tamannā sar-e-mehrāb-e-visāl

kaun aatā hai ye ḳhurshīd-e-farozāñ kī tarah

hama-tan jalwa-fishan mah-o-charaghan ki tarah

kaun aaya dil-e-pur-shauq mein mehman ki tarah

gunj uThi gham-kada-e-ruh mein us ki aawaz

KHwab mein bahte hue chashma-e-irfan ki tarah

zehn-e-fankar mein manind-e-shuur-e-naghma

safha-e-dil pe hai wo nazm ke unwan ki tarah

zau-fishan mere sanam-KHana-e-afkar mein hai

lab-e-masum koi lal-e-badaKHshan ki tarah

ahrman ban ke taaqub mein rahi zulmat-e-shab

chhup gaya koi meri ruh mein yazdan ki tarah

barhana-pa-o-sarasima thi tauqir-e-bashar

wo mere sath raha azmat-e-insan ki tarah

mizha aaluda-ba-KHun chashm-e-tamanna KHun-bar

sina-e-dahr mein hun zaKHm-e-numayan ki tarah

ai mere ham-dam-e-dil-gir dua de mujh ko

us ke qadmon pe rahun shaKH-e-gul-afshan ki tarah

jal uThi sham-e-tamanna sar-e-mehrab-e-visal

kaun aata hai ye KHurshid-e-farozan ki tarah