hamare dard ki jaanib ishaara karti hain

hamāre dard kī jānib ishārā kartī haiñ

faqat kahāniyāñ ham ko gavārā kartī haiñ

ye sādgī ye najābat jo aib haiñ mere

sunā thā in pe to nasleñ guzārā kartī haiñ

ḳhud apne sāmne DaT jaatī haiñ jo shaḳhsiyateñ

vo jīt.tī haiñ kisī se na haarā kartī haiñ

sharīf log ki jaise sukūt-e-āb-e-ravāñ

kuchh ek maujeñ magar sar ubhārā kartī haiñ

badal ga.e haiñ irāde to hasratoñ meñ magar

kuchh ārzūeñ abhī istiḳhārā kartī haiñ

sitāre un kī chamak meñ samānā chāhte haiñ

magar vo āñkheñ falak ko sitārā kartī haiñ

bajā haiñ apne masā.il bajā haiñ apnī hudūd

kahīñ kināroñ se lahreñ kinārā kartī haiñ

zabān-e-shahr to paivand-e-ḳhāk-e-jahal huī

magar vo mahfileñ ab bhī pukārā kartī haiñ

hamare dard ki jaanib ishaara karti hain

faqat kahaniyan hum ko gawara karti hain

ye sadgi ye najabat jo aib hain mere

suna tha in pe to naslen guzara karti hain

KHud apne samne DaT jati hain jo shaKHsiyaten

wo jitti hain kisi se na haara karti hain

sharif log ki jaise sukut-e-ab-e-rawan

kuchh ek maujen magar sar ubhaara karti hain

badal gae hain irade to hasraton mein magar

kuchh aarzuen abhi istiKHara karti hain

sitare un ki chamak mein samana chahte hain

magar wo aankhen falak ko sitara karti hain

baja hain apne masail baja hain apni hudud

kahin kinaron se lahren kinara karti hain

zaban-e-shahr to paiwand-e-KHak-e-jahal hui

magar wo mahfilen ab bhi pukara karti hain