hamare haal se koi jo ba-KHabar rahta

hamāre haal se koī jo bā-ḳhabar rahtā

ḳhayāl us kā hameñ bhī to umr-bhar rahtā

jise bhī ḳhvāhish-e-dīvār-o-dar ho sahrā meñ

vo kam-nasīb to achchhā thā apne ghar rahtā

havā se TuuT ke girnā mirā muqaddar thā

ki zard pattā thā kyūñkar maiñ shāḳh par rahtā

jo dekhtā huuñ zamāne kī nā-shanāsī ko

ye sochtā huuñ ki achchhā thā be-hunar rahtā

hamārī vaj.h se hotī na terī rusvā.ī

hamāre saath agar tū na is qadar rahtā

tazād qaul-o-amal meñ ho jis ke ai 'nādir'

vo shaḳhs kaise nigāhoñ meñ mo'atabar rahtā

hamare haal se koi jo ba-KHabar rahta

KHayal us ka hamein bhi to umr-bhar rahta

jise bhi KHwahish-e-diwar-o-dar ho sahra mein

wo kam-nasib to achchha tha apne ghar rahta

hawa se TuT ke girna mera muqaddar tha

ki zard patta tha kyunkar main shaKH par rahta

jo dekhta hun zamane ki na-shanasi ko

ye sochta hun ki achchha tha be-hunar rahta

hamari wajh se hoti na teri ruswai

hamare sath agar tu na is qadar rahta

tazad qaul-o-amal mein ho jis ke ai 'nadir'

wo shaKHs kaise nigahon mein mo'atabar rahta