hamare hote hote rah gae hain

hamāre hote hote rah ga.e haiñ

qasam se aap achchhe rah ga.e haiñ

hamāre paas aa baiThe the yūñhī

hamāre paas baiThe rah ga.e haiñ

tumhāre paas mere kuchh fasāne

vahīñ sofe pe rakkhe rah ga.e haiñ

ye terī kanda-kārī thī ki dil pe

tire alfāz likkhe rah ga.e haiñ

mire khetoñ se chiḌiyāñ uḌ ga.ī haiñ

mire khetoñ meñ kiiḌe rah ga.e haiñ

bahut jī chāhtā thā lauT jaa.eñ

tirī āñkhoñ ke sadqe rah ga.e haiñ

kise chāheñ to phir ye ishq hogā

ham us maktab meñ bachche rah ga.e haiñ

maiñ haft-aflāk se aage khaḌā huuñ

mire ghar-bār pīchhe rah ga.e haiñ

vo sab āñkheñ churā kar le gayā hai

hasīñ bante sañvarte rah ga.e haiñ

bahut sīkhe haiñ marne ke tarīqe

salīqe zindagī ke rah ga.e haiñ

hamare hote hote rah gae hain

qasam se aap achchhe rah gae hain

hamare pas aa baiThe the yunhi

hamare pas baiThe rah gae hain

tumhaare pas mere kuchh fasane

wahin sofe pe rakkhe rah gae hain

ye teri kanda-kari thi ki dil pe

tere alfaz likkhe rah gae hain

mere kheton se chiDiyan uD gai hain

mere kheton mein kiDe rah gae hain

bahut ji chahta tha lauT jaen

teri aankhon ke sadqe rah gae hain

kise chahen to phir ye ishq hoga

hum us maktab mein bachche rah gae hain

main haft-aflak se aage khaDa hun

mere ghar-bar pichhe rah gae hain

wo sab aankhen chura kar le gaya hai

hasin bante sanwarte rah gae hain

bahut sikhe hain marne ke tariqe

saliqe zindagi ke rah gae hain