hamare shahr mein aane ki surat chahti hain

hamāre shahr meñ aane kī sūrat chāhtī haiñ

havā.eñ bāryābī kī ijāzat chāhtī haiñ

parindoñ se dar-o-dīvār ḳhālī ho ga.e haiñ

mirī āñkheñ nagar ko ḳhūbsūrat chāhtī haiñ

likhe bhī jaao lauh-e-ḳhāk par naqsh-e-udāsī

ki aatī sā.ateñ harf-e-shahādat chāhtī haiñ

diloñ meñ qaid nā-āsūda saarī iltijā.eñ

hisār-e-harf meñ aane kī mohlat chāhtī haiñ

zabānoñ par likhī zaḳhm-e-zabāñ kī lazzateñ ab

dar-o-dīvār par rañg-e-jarāhat chāhtī haiñ

bahut se ḳhvāb in meñ dhund ban kar rah ga.e haiñ

ye āñkheñ izn-e-girya kī sa.ādat chāhtī haiñ

hamare shahr mein aane ki surat chahti hain

hawaen baryabi ki ijazat chahti hain

parindon se dar-o-diwar KHali ho gae hain

meri aankhen nagar ko KHubsurat chahti hain

likhe bhi jao lauh-e-KHak par naqsh-e-udasi

ki aati saaten harf-e-shahadat chahti hain

dilon mein qaid na-asuda sari iltijaen

hisar-e-harf mein aane ki mohlat chahti hain

zabanon par likhi zaKHm-e-zaban ki lazzaten ab

dar-o-diwar par rang-e-jarahat chahti hain

bahut se KHwab in mein dhund ban kar rah gae hain

ye aankhen izn-e-girya ki saadat chahti hain