hamari aankh mein do pal ki jo KHumari thi

hamārī aañkh meñ do pal kī jo ḳhumārī thī

udhārī thī vo tumheñ dekh kar utārī thī

hamāre shānoñ pe din bojh thā gharāne kā

safar meñ shaam kaTī raat be-qarārī thī

ḳhulūs naam kā panchhī tumhāre paas na thā

daġhā thā jhuuT thā tum meñ fareb-kārī thī

tumhāre baad na.e ḳhvāb kī talāsh meñ the

hamārī palkoñ pe vo ek raat bhārī thī

utārne meñ mirī umr sarf ho ga.ī hai

vo dil-lagī kī jo chhoTī sī ik udhārī thī

hamārī jaan ghulī jā rahī thī kyā yuuñ hī

badan meñ jaarī vahī rasm-e-jāñ-nisārī thī

hamari aankh mein do pal ki jo KHumari thi

udhaari thi wo tumhein dekh kar utari thi

hamare shanon pe din bojh tha gharane ka

safar mein sham kaTi raat be-qarari thi

KHulus nam ka panchhi tumhaare pas na tha

dagha tha jhuT tha tum mein fareb-kari thi

tumhaare baad nae KHwab ki talash mein the

hamari palkon pe wo ek raat bhaari thi

utarne mein meri umr sarf ho gai hai

wo dil-lagi ki jo chhoTi si ek udhaari thi

hamari jaan ghuli ja rahi thi kya yun hi

badan mein jari wahi rasm-e-jaan-nisari thi