hamari fikr bhi KHasta hamare kar ghalat

hamārī fikr bhī ḳhasta hamāre kaar ġhalat

hamārī jast ne baḳhshā hameñ hisār ġhalat

kahīñ ye qalb-e-havādis kī taab lā na sake

kahīñ ye dil hī na le le koī qarār ġhalat

ye merā dil hai tamannā.eñ paal letā hai

huā hai is pe bhī saaya koī savār ġhalat

mujhe yaqīñ hai na ā.eñge merī turbat par

barā-e-fātiha chuniyegā kab mazār ġhalat

ye kis ne abrū-e-ḳhamdār se mujhe dekhā

kahāñ se aa ga.ī haq meñ mire bahār ġhalat

mire nasīb ke qausain ne diyā tohfa

kabhī to lail-e-musalsal kabhī nahār ġhalat

maiñ apnī auj kā tum ko hisāb kyā detā

mirī lakīr thī uljhī mirā madār ġhalat

maiñ apne zaḳhm-e-jigar soz-o-sāz kyuuñ likkhūñ

hazār baar ginā phir bhī hai shumār ġhalat

hamari fikr bhi KHasta hamare kar ghalat

hamari jast ne baKHsha hamein hisar ghalat

kahin ye qalb-e-hawadis ki tab la na sake

kahin ye dil hi na le le koi qarar ghalat

ye mera dil hai tamannaen pal leta hai

hua hai is pe bhi saya koi sawar ghalat

mujhe yaqin hai na aaenge meri turbat par

bara-e-fatiha chuniyega kab mazar ghalat

ye kis ne abru-e-KHamdar se mujhe dekha

kahan se aa gai haq mein mere bahaar ghalat

mere nasib ke qausain ne diya tohfa

kabhi to lail-e-musalsal kabhi nahaar ghalat

main apni auj ka tum ko hisab kya deta

meri lakir thi uljhi mera madar ghalat

main apne zaKHm-e-jigar soz-o-saz kyun likkhun

hazar bar gina phir bhi hai shumar ghalat