hamari kaif saza-war-e-ehtisab nahin

hamārī kaif sazā-vār-e-ehtisāb nahīñ

ḳhayāl-e-chashm hai kuchh sāġhar-e-sharāb nahīñ

vo be-naqāb huā hai to ye tamāshā hai

do-chār hone kī āñkhoñ meñ apnī taab nahīñ

ye mujh ko us ke taġhāful se hai yaqīn ki haa.e

javāb-nāme so ai naame kā javāb nahīñ

samā rahā hai yahāñ tak parī-ruḳhoñ kā jamāl

hamārī āñkhoñ meñ ḳhālī maqām-e-ḳhvāb nahīñ

butoñ ke parde meñ ham dekhte haiñ nūr-e-ḳhudā

ḳhudā ke dekhne kī ai kalīm taab nahīñ

vufūr-e-ashk se kyoñ hai gale talak paanī

hamārā kāsa-e-sar kāsa-e-habāb nahīñ

maiñ bazm-e-shāhid-o-sāqī meñ kyoñ na vajd karūñ

barā-e-zohd-o-vara.a ālam-e-shabāb nahīñ

kiyā hai daaġh ne kyoñ us ko manzil-e-ḳhurshīd

hamārā dil hai ye kuchh burj-e-āftāb nahīñ

huā hai mān-e-dīdār-e-yār parda-e-chashm

khulī jo aañkh to kuchh darmiyāñ hijāb nahīñ

ye zabt-e-girya meñ aalam hai be-qarārī kā

ki barq kauñdtī hai bārish-e-sahāb nahīñ

bashar ke jism meñ hai jaan māya-e-ġhaflat

so ai dīda-e-tasvīr kis ko ḳhvāb nahīñ

dilā hai mausam-e-pīrī mahal jām-e-sharāb

baġhair sub.h koī vaqt-e-āftāb nahīñ

maiñ ġhash se us ke chhiḌakte hī hoshiyār huā

kisī sanam kā pasīna hai ye gulāb nahīñ

bahut fareb se ham vahshiyoñ ko vahshat hai

hamāre dasht meñ 'nāsiḳh' kahīñ sarāb nahīñ

hamari kaif saza-war-e-ehtisab nahin

KHayal-e-chashm hai kuchh saghar-e-sharab nahin

wo be-naqab hua hai to ye tamasha hai

do-chaar hone ki aankhon mein apni tab nahin

ye mujh ko us ke taghaful se hai yaqin ki hae

jawab-name so ai name ka jawab nahin

sama raha hai yahan tak pari-ruKHon ka jamal

hamari aankhon mein KHali maqam-e-KHwab nahin

buton ke parde mein hum dekhte hain nur-e-KHuda

KHuda ke dekhne ki ai kalim tab nahin

wufur-e-ashk se kyon hai gale talak pani

hamara kasa-e-sar kasa-e-habab nahin

main bazm-e-shahid-o-saqi mein kyon na wajd karun

bara-e-zohd-o-wara aalam-e-shabab nahin

kiya hai dagh ne kyon us ko manzil-e-KHurshid

hamara dil hai ye kuchh burj-e-aftab nahin

hua hai man-e-didar-e-yar parda-e-chashm

khuli jo aankh to kuchh darmiyan hijab nahin

ye zabt-e-girya mein aalam hai be-qarari ka

ki barq kaundti hai barish-e-sahab nahin

bashar ke jism mein hai jaan maya-e-ghaflat

so ai dida-e-taswir kis ko KHwab nahin

dila hai mausam-e-piri mahal jam-e-sharab

baghair subh koi waqt-e-aftab nahin

main ghash se us ke chhiDakte hi hoshiyar hua

kisi sanam ka pasina hai ye gulab nahin

bahut fareb se hum wahshiyon ko wahshat hai

hamare dasht mein 'nasiKH' kahin sarab nahin