hamari tarah koi dusra hua bhi nahin

hamārī tarah koī dūsrā huā bhī nahīñ

vo dard dil meñ rakhā hai jo lā-davā bhī nahīñ

hamārā dard ajab marhale meñ hai ki jahāñ

vo be-suḳhan bhī nahīñ aur lab-kushā bhī nahīñ

usī ko dekhtī rahtī hai chashm-e-shauq mudām

jo ġham abhī sar-e-shāḳh-e-alam khulā bhī nahīñ

ajiib tarah se raushan huī hai ḳhalvat-e-ġham

ki raushnī hai bahut aur diyā jalā bhī nahīñ

ye dasht-e-shauq bahut āfiyat-gazīda hai

ki ab yahāñ pe to imkān-e-naqsh-e-pā bhī nahīñ

guzar hai kaisī fazāoñ se aaj tā.ir-e-ishq

ki zer-e-bāzū-e-parvāz ab ḳhalā bhī nahīñ

maiñ aise shaḳhs ko zindoñ meñ kyā shumār karūñ

jo sochtā bhī nahīñ ḳhvāb dekhtā bhī nahīñ

ye ishq ḳhaak hī hone kā naam thā so hameñ

sila milā bhī bahut aur sila milā bhī nahīñ

ye asr-e-nau kī chitāoñ meñ aag kaisī hai

ki ruuh raakh huī aur badan jalā bhī nahīñ

tamām umr ajab vaz.a-dāriyoñ meñ kaTī

use aziiz rakhā jo hamārā thā bhī nahīñ

hamari tarah koi dusra hua bhi nahin

wo dard dil mein rakha hai jo la-dawa bhi nahin

hamara dard ajab marhale mein hai ki jahan

wo be-suKHan bhi nahin aur lab-kusha bhi nahin

usi ko dekhti rahti hai chashm-e-shauq mudam

jo gham abhi sar-e-shaKH-e-alam khula bhi nahin

ajib tarah se raushan hui hai KHalwat-e-gham

ki raushni hai bahut aur diya jala bhi nahin

ye dasht-e-shauq bahut aafiyat-gazida hai

ki ab yahan pe to imkan-e-naqsh-e-pa bhi nahin

guzar hai kaisi fazaon se aaj tair-e-ishq

ki zer-e-bazu-e-parwaz ab KHala bhi nahin

main aise shaKHs ko zindon mein kya shumar karun

jo sochta bhi nahin KHwab dekhta bhi nahin

ye ishq KHak hi hone ka nam tha so hamein

sila mila bhi bahut aur sila mila bhi nahin

ye asr-e-nau ki chitaon mein aag kaisi hai

ki ruh rakh hui aur badan jala bhi nahin

tamam umr ajab waza-dariyon mein kaTi

use aziz rakha jo hamara tha bhi nahin