hamari us se jo surat hui safai ki

hamārī us se jo sūrat huī safā.ī kī

hujūm-e-ġham ne adū par baḌī chaḌhā.ī kī

faqīr-e-mast tire hāl-e-vasl kyā jāneñ

ki oḌhe baiThe haiñ kamlī shab-e-judā.ī kī

gadā-e-kūcha-e-jānāñ huuñ martaba hai baḌā

ki mere naam hai jāgīr be-navā.ī kī

hamīñ to ālam-e-hastī meñ ik nikamme haiñ

tumhīñ meñ aa ga.iiñ sab ḳhūbiyāñ ḳhudā.ī kī

mile na kyuuñ tumheñ shāhoñ kā martaba 'āshiq'

bahut dinoñ dar-e-ḳhvāja pe hai gadā.ī kī

hamari us se jo surat hui safai ki

hujum-e-gham ne adu par baDi chaDhai ki

faqir-e-mast tere haal-e-wasl kya jaanen

ki oDhe baiThe hain kamli shab-e-judai ki

gada-e-kucha-e-jaanan hun martaba hai baDa

ki mere nam hai jagir be-nawai ki

hamin to aalam-e-hasti mein ek nikamme hain

tumhin mein aa gain sab KHubiyan KHudai ki

mile na kyun tumhein shahon ka martaba 'ashiq'

bahut dinon dar-e-KHwaja pe hai gadai ki