hamdamo kya mujhko tum un se mila sakte nahin

hamdamo kyā mujh ko tum un se milā sakte nahīñ

maiñ to jā saktā huuñ vaañ gar yaañ vo aa sakte nahīñ

sharm hai un ko bahut har-dam chimaTne se mire

vo taḌapte haiñ va-lekin ġhul machā sakte nahīñ

haath meñ hai haath aur koī nahīñ hai ās-pās

vo to haiñ qaabū meñ par ham jī chalā sakte nahīñ

chaudhvīñ hai raat aur chhiTkī huī hai chāñdnī

ham kamand ab un ke koThe par lagā sakte nahīñ

kyuuñ miyāñ-'rañgīñ' bhalā ab is zamīñ meñ soch se

kyā ġhazal tum hasb-e-hāl apnī sunā sakte nahīñ

bas maiñ haiñ vo ġhair ke ham ko bulā sakte nahīñ

aur ham us jā kisī sūrat se jā sakte nahīñ

ham ko un se un ko ham se jitnī ulfat hai use

vo ghaTā sakte haiñ lekin ham ghaTā sakte nahīñ

ġhair se ham ko dilāte haiñ vo lākhoñ gāliyāñ

pichhlī bāteñ yaad ham un ko dilā sakte nahīñ

but bane haiñ yuuñ to ham bāteñ banāte haiñ hazār

baat lekin vasl kī aslan batā sakte nahīñ

hamdamo kya mujh ko tum un se mila sakte nahin

main to ja sakta hun wan gar yan wo aa sakte nahin

sharm hai un ko bahut har-dam chimaTne se mere

wo taDapte hain wa-lekin ghul macha sakte nahin

hath mein hai hath aur koi nahin hai aas-pas

wo to hain qabu mein par hum ji chala sakte nahin

chaudhwin hai raat aur chhiTki hui hai chandni

hum kamand ab un ke koThe par laga sakte nahin

kyun miyan-'rangin' bhala ab is zamin mein soch se

kya ghazal tum hasb-e-haal apni suna sakte nahin

bas main hain wo ghair ke hum ko bula sakte nahin

aur hum us ja kisi surat se ja sakte nahin

hum ko un se un ko hum se jitni ulfat hai use

wo ghaTa sakte hain lekin hum ghaTa sakte nahin

ghair se hum ko dilate hain wo lakhon galiyan

pichhli baaten yaad hum un ko dila sakte nahin

but bane hain yun to hum baaten banate hain hazar

baat lekin wasl ki aslan bata sakte nahin