hamein barbaadiyon pe muskurana KHub aata hai

hameñ barbādiyoñ pe muskurānā ḳhuub aatā hai

añdherī raat meñ dīpak jalānā ḳhuub aatā hai

ġhalat-fahmī tumheñ kuchh aur aatā ho na aatā ho

achānak aag paanī meñ lagānā ḳhuub aatā hai

zarā sī baat pe dīvār khiñchvāne lagā hai vo

use bhī raa.ī kā parbat banānā ḳhuub aatā hai

tire har jhūTh ko sach maan lete haiñ hamesha ham

hameñ bhī rasm-e-ulfat ko nibhānā ḳhuub aatā hai

kisī ke sāmne sar ko jhukāte ham nahīñ lekin

ḳhudā ke sāmne sar ko jhukānā ḳhuub aatā hai

tumhāre ġham ne hī baḳhshī hai ham ko ye hunar-mandī

hameñ ashko ko ab motī banānā ḳhuub aatā hai

hamein barbaadiyon pe muskurana KHub aata hai

andheri raat mein dipak jalana KHub aata hai

ghalat-fahmi tumhein kuchh aur aata ho na aata ho

achanak aag pani mein lagana KHub aata hai

zara si baat pe diwar khinchwane laga hai wo

use bhi rai ka parbat banana KHub aata hai

tere har jhuTh ko sach man lete hain hamesha hum

hamein bhi rasm-e-ulfat ko nibhana KHub aata hai

kisi ke samne sar ko jhukate hum nahin lekin

KHuda ke samne sar ko jhukana KHub aata hai

tumhaare gham ne hi baKHshi hai hum ko ye hunar-mandi

hamein ashko ko ab moti banana KHub aata hai