hamein bhula nahin afsana dil ka

hameñ bhūlā nahīñ afsāna dil kā

abhī hāthoñ meñ hai paimāna dil kā

dhuāñ uThtā nazar aatā hai har-sū

abhī ābād hai vīrāna dil kā

jahāñ bikhrī hai ab ḳhākistar-e-dil

usī jā thā kabhī kāshāna dil kā

abhī tak yaad haiñ vo din ki jab thā

har ik āvāra ġham dīvāna dil kā

vo ummīdoñ kā ik halkā tabassum

dhaḌak uThnā vo betābāna dil kā

kisī aañsū kī ġham hotī sadā par

larazna Dūbnā ghabrānā dil kā

ġham-e-daurāñ ġham-e-jānāñ ġham-e-jāñ

har ik manzil pe thā nazrāna dil kā

khile jaate the gul har har qadam par

kahīñ bhī qāfila Thahrā na dil kā

tilism-e-rañg-o-bū thā TūTne tak

Thikāna phir na thā gul kā na dil kā

udhar armāñ idhar ehsās-e-hirmāñ

chhuTā kis moḌ par yārāna dil kā

hameñ bāda-kash-e-dard-e-tamannā

hamīñ par band hai mai-ḳhāna dil kā

hamein bhula nahin afsana dil ka

abhi hathon mein hai paimana dil ka

dhuan uThta nazar aata hai har-su

abhi aabaad hai virana dil ka

jahan bikhri hai ab KHakistar-e-dil

usi ja tha kabhi kashana dil ka

abhi tak yaad hain wo din ki jab tha

har ek aawara gham diwana dil ka

wo ummidon ka ek halka tabassum

dhaDak uThna wo betabana dil ka

kisi aansu ki gham hoti sada par

larazna Dubna ghabrana dil ka

gham-e-dauran gham-e-jaanan gham-e-jaan

har ek manzil pe tha nazrana dil ka

khile jate the gul har har qadam par

kahin bhi qafila Thahra na dil ka

tilism-e-rang-o-bu tha TuTne tak

Thikana phir na tha gul ka na dil ka

udhar arman idhar ehsas-e-hirman

chhuTa kis moD par yarana dil ka

hamein baada-kash-e-dard-e-tamanna

hamin par band hai mai-KHana dil ka