hamein kahti hai duniya zaKHm-e-dil zaKHm-e-jigar wale

hameñ kahtī hai duniyā zaḳhm-e-dil zaḳhm-e-jigar vaale

zarā tum bhī to dekho ham ko tum bhī ho nazar vaale

nazar ā.eñge naqsh-e-pā jahāñ us fitnagar vaale

chaleñge sar ke bal rasta vahāñ ke rahguzar vaale

sitam-ījādiyoñ kī shaan meñ baTTā na aa jaa.e

na karnā bhuul kar tum jaur charḳh-e-kīna-var vaale

jafā-o-jaur-e-gul-chīñ se chaman mātam-kada sā hai

phaḌakte haiñ qafas kī tarah āzādī meñ par vaale

alif se tā-ba-yā lillāh afsāna sunā diije

janāb-e-mūsa-e-imrāñ vahī hairat-nagar vaale

hameñ mālūm hai ham mānte haiñ ham ne sīkhā hai

dil āzurda huā karte haiñ az had chashm-e-tar vaale

kaTāne ko galā āThoñ pahr maujūd rahte haiñ

vo dil vaale jigar vaale sahī ham bhī haiñ sar vaale

tamāshā dekh kar duniyā kā 'sā.el' ko huī hairat

ki takte rah ga.e bad-gauharoñ kā muñh guhar vaale

hamein kahti hai duniya zaKHm-e-dil zaKHm-e-jigar wale

zara tum bhi to dekho hum ko tum bhi ho nazar wale

nazar aaenge naqsh-e-pa jahan us fitnagar wale

chalenge sar ke bal rasta wahan ke rahguzar wale

sitam-ijadiyon ki shan mein baTTa na aa jae

na karna bhul kar tum jaur charKH-e-kina-war wale

jafa-o-jaur-e-gul-chin se chaman matam-kada sa hai

phaDakte hain qafas ki tarah aazadi mein par wale

alif se ta-ba-ya lillah afsana suna dije

janab-e-musa-e-imran wahi hairat-nagar wale

hamein malum hai hum mante hain hum ne sikha hai

dil aazurda hua karte hain az had chashm-e-tar wale

kaTane ko gala aaThon pahr maujud rahte hain

wo dil wale jigar wale sahi hum bhi hain sar wale

tamasha dekh kar duniya ka 'sael' ko hui hairat

ki takte rah gae bad-gauharon ka munh guhar wale