hamein KHabar hai wo kyon humse ab nahin milta

hameñ ḳhabar hai vo kyoñ ham se ab nahīñ miltā

yahāñ kisī se koī be-sabab nahīñ miltā

phir āftāb kahāñ apnī raushnī bāñTe

na.e charāġhoñ meñ husn-e-talab nahīñ miltā

batā rahī haiñ adīboñ ke ghar kī tahzībeñ

virāsatoñ meñ sabhī ko adab nahīñ miltā

maiñ jalne lagtā huuñ tanhā.iyoñ ke dozaḳh meñ

kabhī vo merī zarūrat pe jab nahīñ miltā

udaas mat ho jo hāsil na kar sakā us ko

kabhī kisī ko zamāne meñ sab nahīñ miltā

hai zaat aap kī taḳhlīq-e-do-jahāñ kā sabab

na milte aap hameñ ham ko rab nahīñ miltā

hamein KHabar hai wo kyon hum se ab nahin milta

yahan kisi se koi be-sabab nahin milta

phir aaftab kahan apni raushni banTe

nae charaghon mein husn-e-talab nahin milta

bata rahi hain adibon ke ghar ki tahziben

wirasaton mein sabhi ko adab nahin milta

main jalne lagta hun tanhaiyon ke dozaKH mein

kabhi wo meri zarurat pe jab nahin milta

udas mat ho jo hasil na kar saka us ko

kabhi kisi ko zamane mein sab nahin milta

hai zat aap ki taKHliq-e-do-jahan ka sabab

na milte aap hamein hum ko rab nahin milta