hamein na dekhiye hum gham ke mare jaise hain

hameñ na dekhiye ham ġham ke maare jaise haiñ

ki ham to vaise haiñ us ke ishāre jaise haiñ

ye vasl, vasl kī mad meñ ġhalat shumār kiyā

ki us ke saath bhī yūñhī kināre jaise haiñ

tilism-e-chashm salāmat rahe ki jis ke sabab

kahīñ haiñ phuul kahīñ ham sitāre jaise haiñ

vo jāntā hai jabhī duur bhāgtā hai bahut

vo jāntā hai ham us ko ḳhasāre jaise haiñ

ham aaj hañste hue kuchh alag dikhā.ī diye

ba-vaqt-e-girya ham aise the, saare jaise haiñ

use kaho ki sitāre shumār to na kare

kaho qadam dhare, chhoḌe utāre jaise haiñ

ye ġham ke phuul haiñ yā sher dekhiye aur bas

hameñ pata hai ki ham ne nikhāre jaise haiñ

hamein na dekhiye hum gham ke mare jaise hain

ki hum to waise hain us ke ishaare jaise hain

ye wasl, wasl ki mad mein ghalat shumar kiya

ki us ke sath bhi yunhi kinare jaise hain

tilism-e-chashm salamat rahe ki jis ke sabab

kahin hain phul kahin hum sitare jaise hain

wo jaanta hai jabhi dur bhagta hai bahut

wo jaanta hai hum us ko KHasare jaise hain

hum aaj hanste hue kuchh alag dikhai diye

ba-waqt-e-girya hum aise the, sare jaise hain

use kaho ki sitare shumar to na kare

kaho qadam dhare, chhoDe utare jaise hain

ye gham ke phul hain ya sher dekhiye aur bas

hamein pata hai ki hum ne nikhaare jaise hain