hamein ras aani hai rahon ki gaThri

hameñ raas aanī hai rāhoñ kī gaThrī

rakho paas apnī panāhoñ kī gaThrī

badal jaa.e kaash is hasīñ marhale par

hamārī tumhārī gunāhoñ kī gaThrī

mohabbat kī rāheñ thiiñ hamvār lekin

hamīñ Dho na paa.e nibāhoñ kī gaThrī

takalluf ke sāmān bikhre the bāham

so bāñdhe rahe ham bhī bāñhoñ kī gaThrī

ujāle ke haiñ in dinoñ daam ūñche

chalo luuT leñ rū-siyāhoñ kī gaThrī

dharī rah ga.ī munsif-e-dil ke aage

bayānoñ kī gaThrī gavāhoñ kī gaThrī

na uglī hī jaa.e na nigale bane hai

gale meñ phañsī ek aahoñ kī gaThrī

ye sūkhī huī fasl-e-ġham jī uThegī

agar khul ga.ī in nigāhoñ kī gaThrī

uTheñgī kisī roz sailāb ban kar

ye ābādiyāñ haiñ tabāhoñ kī gaThrī

mirī sīdhī saadī sī bātoñ pe mat jā

mirī zaat hai kaj-kulāhoñ kī gaThrī

hamein ras aani hai rahon ki gaThri

rakho pas apni panahon ki gaThri

badal jae kash is hasin marhale par

hamari tumhaari gunahon ki gaThri

mohabbat ki rahen thin hamwar lekin

hamin Dho na pae nibahon ki gaThri

takalluf ke saman bikhre the baham

so bandhe rahe hum bhi banhon ki gaThri

ujale ke hain in dinon dam unche

chalo luT len ru-siyahon ki gaThri

dhari rah gai munsif-e-dil ke aage

bayanon ki gaThri gawahon ki gaThri

na ugli hi jae na nigale bane hai

gale mein phansi ek aahon ki gaThri

ye sukhi hui fasl-e-gham ji uThegi

agar khul gai in nigahon ki gaThri

uThengi kisi roz sailab ban kar

ye aabaadiyan hain tabahon ki gaThri

meri sidhi sadi si baaton pe mat ja

meri zat hai kaj-kulahon ki gaThri