hamein to KHair koi dusra achchha nahin lagta

hameñ to ḳhair koī dūsrā achchhā nahīñ lagtā

unheñ ḳhud bhī koī apne sivā achchhā nahīñ lagtā

nahīñ gar naġhma-e-shādī nafīr-e-ġham sahī koī

ki sāz-e-zindagānī be-sadā achchhā nahīñ lagtā

hameñ ye band kamroñ kā makāñ kuchh bhā gayā itnā

ki ham ko ab koī āñgan khulā achchhā nahīñ lagtā

kuchh itnī talḳh us din ho ga.ī thī guftugū un se

ka.ī din se zabāñ kā zā.iqa achchhā nahīñ lagtā

kabhī nazdīk aa kar rū-ba-rū bhī hoñ mulāqāteñ

ki ham-sāyoñ meñ itnā fāsla achchhā nahīñ lagtā

kaThin rastoñ pe chalnā apnī uftād-e-tabī.at hai

hameñ āsān koī rāstā achchhā nahīñ lagtā

ise ham marsiya-goyoñ pe 'mohsin' chhoḌ dete haiñ

likheñ ham aap apnā marsiya achchhā nahīñ lagtā

hamein to KHair koi dusra achchha nahin lagta

unhen KHud bhi koi apne siwa achchha nahin lagta

nahin gar naghma-e-shadi nafir-e-gham sahi koi

ki saz-e-zindagani be-sada achchha nahin lagta

hamein ye band kamron ka makan kuchh bha gaya itna

ki hum ko ab koi aangan khula achchha nahin lagta

kuchh itni talKH us din ho gai thi guftugu un se

kai din se zaban ka zaiqa achchha nahin lagta

kabhi nazdik aa kar ru-ba-ru bhi hon mulaqaten

ki ham-sayon mein itna fasla achchha nahin lagta

kaThin raston pe chalna apni uftad-e-tabiat hai

hamein aasan koi rasta achchha nahin lagta

ise hum marsiya-goyon pe 'mohsin' chhoD dete hain

likhen hum aap apna marsiya achchha nahin lagta