hamesha KHun-e-shahidan ke rang se aabaad

hamesha ḳhūn-e-shahīdāñ ke rañg se ābād

ye karbalā-e-muallā ye basra o baġhdād

jahāñ ko phir se naved-e-bahār dete haiñ

abū-ġharīb kī jailoñ ke kuchh sitam-ījād

hayāt-o-marg ke sab marhale tamām hue

kafan lapeT ke nikle haiñ harche-bād-abād

purānī bastiyāñ sab ḳhāk-o-ḳhūñ meñ ġhaltāñ haiñ

''kareñge ahl-e-nazar taaza bastiyāñ ābād''

laboñ pe ḳhair ke na.are haiñ aur kuchh bhī nahīñ

diloñ meñ jaag rahā hai zamīr-e-ibn-e-ziyād

iraq ḳhūn-e-shahīdāñ se surḳh-rū hogā

bamoñ ke Dher haiñ launcher haiñ tesha-e-farhād

pahuñch ga.e haiñ ham aise dayār meñ ki 'vahīd'

jahāñ gunāh to lāzim hai nekiyāñ barbād

hamesha KHun-e-shahidan ke rang se aabaad

ye karbala-e-mualla ye basra o baghdad

jahan ko phir se nawed-e-bahaar dete hain

abu-gharib ki jailon ke kuchh sitam-ijad

hayat-o-marg ke sab marhale tamam hue

kafan lapeT ke nikle hain harche-baad-abaad

purani bastiyan sab KHak-o-KHun mein ghaltan hain

karenge ahl-e-nazar taza bastiyan aabaad

labon pe KHair ke nare hain aur kuchh bhi nahin

dilon mein jag raha hai zamir-e-ibn-e-ziyaad

iraq KHun-e-shahidan se surKH-ru hoga

bamon ke Dher hain launcher hain tesha-e-farhad

pahunch gae hain hum aise dayar mein ki 'wahid'

jahan gunah to lazim hai nekiyan barbaad