hamesha manna ai yar mashwara dil ka

hamesha mānñā ai yaar mashvara dil kā

kabhī ġhalat nahīñ hotā hai faisla dil kā

baḌā ajiib hai yaaro mo.āmla dil kā

ġham-o-alam se hai din raat vāsta dil kā

alāva is ke na hamdam na koī rahbar hai

hujūm-e-ġham liye phirtā hai qāfila dil kā

kabhī ḳhushī se kabhī ġham meñ kyoñ dhaḌaktā hai

samajh meñ kuchh nahīñ aatā hai falsafa dil kā

tamām jism ke a.azā pe hukmrānī hai

ḳhudā ne ḳhuub banāyā hai martaba dil kā

mileñ to milne kī rahtī hai aarzū dil meñ

ulajh rahā hai ka.ī din se mas.ala dil kā

tujhe banā.eñge apnā banā.eñge apnā

koī badal nahīñ saktā hai faisla dil kā

agar aziiz hai tum ko sukūn-e-dil yaaro

banā.e rakhnā hasīnoñ se fāsla dil kā

ġhamoñ kā bojh masā.ib hoñ yā pareshānī

kabhī na chhoḌnā ai 'dard' hausla dil kā

hamesha manna ai yar mashwara dil ka

kabhi ghalat nahin hota hai faisla dil ka

baDa ajib hai yaro moamla dil ka

gham-o-alam se hai din raat wasta dil ka

alawa is ke na hamdam na koi rahbar hai

hujum-e-gham liye phirta hai qafila dil ka

kabhi KHushi se kabhi gham mein kyon dhaDakta hai

samajh mein kuchh nahin aata hai falsafa dil ka

tamam jism ke aaza pe hukmrani hai

KHuda ne KHub banaya hai martaba dil ka

milen to milne ki rahti hai aarzu dil mein

ulajh raha hai kai din se masala dil ka

tujhe banaenge apna banaenge apna

koi badal nahin sakta hai faisla dil ka

agar aziz hai tum ko sukun-e-dil yaro

banae rakhna hasinon se fasla dil ka

ghamon ka bojh masaib hon ya pareshani

kabhi na chhoDna ai 'dard' hausla dil ka