hamin nashad nazar aate hain dil-shad hain sab

hamīñ nāshād nazar aate haiñ dil-shād haiñ sab

hamīñ is daur meñ barbād haiñ ābād haiñ sabab

ḳhāksāroñ se bhalā itnī kudūrat kyā hai

ek dāman ke jhaTakne meñ to barbād haiñ sabab

shikva ab kyā hai tujhe kahte na the ham ai dil

jin ke talvār se abrū haiñ vo jallād haiñ sab

uqde khul jā.eñge aġhyār ke rafta rafta

hamīñ zulfoñ ke giraftār haiñ āzād haiñ sab

un hasīnoñ meñ burā kis ko kahūñ kis ko bhalā

mujhe dīvāna banāne ko jo tayyār haiñ sab

āstīñ dīda-e-giryāñ se judā ho kyūñkar

nahīñ bhūle kisī chitvan ke maze yaad haiñ sab

kis ke kākul nahīñ shānoñ pe khule rahte hai

dām-bar-dosh mire vāste sayyād haiñ sabab

koī suntā nahīñ fariyād kisī ke bulbul

kahne ko jitne haiñ gul-gosh be-fariyād haiñ sab

dasht-gardī hī davā mujh ko agar saudā hai

ḳhaar jañgal ke nahīñ nashtar-e-fassād haiñ sab

sham.a rotī hai to is bazm meñ sar kaTtā hai

dādras koī nahīñ bar-sar-e-bedād haiñ sab

na to raftār bure aur na guftār bure

jitnī us shab meñ adā.eñ haiñ ḳhudā-dād haiñ sab

sadqe ruḳh par huuñ ki qurbān qad-e-zebā par

ġhairat-e-gul meñ ye but ġhairat-e-shamshād haiñ sab

nsibatan farq nahīñ ek haiñ abnā-e-jahāñ

ek hai un kī aur ik baap kī aulād haiñ sab

us kī dīvār se sar phoḌ rahe haiñ āshiq

rashk-e-shīrīñ hai vo but ġhairat-e-farhād haiñ sab

dil-lagī kis se karūñ 'bahr' ki jī chhūT gayā

mehr-pesha nahīñ koī sitam-ījād haiñ sab

hamin nashad nazar aate hain dil-shad hain sab

hamin is daur mein barbaad hain aabaad hain sabab

KHaksaron se bhala itni kudurat kya hai

ek daman ke jhaTakne mein to barbaad hain sabab

shikwa ab kya hai tujhe kahte na the hum ai dil

jin ke talwar se abru hain wo jallad hain sab

uqde khul jaenge aghyar ke rafta rafta

hamin zulfon ke giraftar hain aazad hain sab

un hasinon mein bura kis ko kahun kis ko bhala

mujhe diwana banane ko jo tayyar hain sab

aastin dida-e-giryan se juda ho kyunkar

nahin bhule kisi chitwan ke maze yaad hain sab

kis ke kakul nahin shanon pe khule rahte hai

dam-bar-dosh mere waste sayyaad hain sabab

koi sunta nahin fariyaad kisi ke bulbul

kahne ko jitne hain gul-gosh be-fariyaad hain sab

dasht-gardi hi dawa mujh ko agar sauda hai

KHar jangal ke nahin nashtar-e-fassad hain sab

shama roti hai to is bazm mein sar kaTta hai

dadras koi nahin bar-sar-e-bedad hain sab

na to raftar bure aur na guftar bure

jitni us shab mein adaen hain KHuda-dad hain sab

sadqe ruKH par hun ki qurban qad-e-zeba par

ghairat-e-gul mein ye but ghairat-e-shamshad hain sab

nsibatan farq nahin ek hain abna-e-jahan

ek hai un ki aur ek bap ki aulad hain sab

us ki diwar se sar phoD rahe hain aashiq

rashk-e-shirin hai wo but ghairat-e-farhad hain sab

dil-lagi kis se karun 'bahr' ki ji chhuT gaya

mehr-pesha nahin koi sitam-ijad hain sab