hangam-e-naza girya yahan be-kasi ka tha

hañgām-e-naza.a girya yahāñ be-kasī kā thā

tum hañs paḌe ye kaun sā mauqa hañsī kā thā

uTThā na merī gor se dushman bhī baiTh kar

kyā aalam aaj haa.e mirī bekasī kā thā

chhāyā hai āsmāñ kī tarah qabr-e-ġhair par

dil meñ mire ġhubār bharā jo kabhī kā thā

dil ne mujhe ḳharāb kiyā kū-e-yār meñ

dushman par e'tibār mujhe dostī kā thā

sahrā meñ phir rahe the sulaimāñ bane hue

jis ko junūn kahte haiñ saaya parī kā thā

dikh jā.egā dil is liye jaarī hue na ashk

dekho to paas naza.a meñ kitnā kisī kā thā

ye apnī vaz.a aur ye dushnām se farosh

sun kar jo pī ga.e ye mazā muflisī kā thā

jis anjuman meñ baiTh gayā raunaq aa ga.ī

kuchh aadmī 'riyāz' ajab dil-lagī kā thā

hangam-e-naza girya yahan be-kasi ka tha

tum hans paDe ye kaun sa mauqa hansi ka tha

uTTha na meri gor se dushman bhi baiTh kar

kya aalam aaj hae meri bekasi ka tha

chhaya hai aasman ki tarah qabr-e-ghair par

dil mein mere ghubar bhara jo kabhi ka tha

dil ne mujhe KHarab kiya ku-e-yar mein

dushman par e'tibar mujhe dosti ka tha

sahra mein phir rahe the sulaiman bane hue

jis ko junun kahte hain saya pari ka tha

dikh jaega dil is liye jari hue na ashk

dekho to pas naza mein kitna kisi ka tha

ye apni waza aur ye dushnam se farosh

sun kar jo pi gae ye maza muflisi ka tha

jis anjuman mein baiTh gaya raunaq aa gai

kuchh aadmi 'riyaz' ajab dil-lagi ka tha