hangama-e-hasti se guzar kyun nahin jate

hañgāma-e-hastī se guzar kyuuñ nahīñ jaate

raste meñ khaḌe ho ga.e ghar kyuuñ nahīñ jaate

mai-ḳhāne meñ shikva hai bahut tīra-shabī kā

mai-ḳhāne meñ bā-dīda-e-tar kyuuñ nahīñ jaate

ab jubba-o-dastār kī vaq.at nahīñ baaqī

rindoñ meñ ba-andāz-e-digar kyuuñ nahīñ jaate

jis shahr meñ gumrāhī azīz-e-dil-o-jāñ ho

us shahr-e-malāmat meñ ḳhizar kyuuñ nahīñ jaate

tosha nahīñ koī nasīm-e-saharī kā

be-rāhila o zād-e-safar kyuuñ nahīñ jaate

shāyad ki shanāsā ho koī be-hunarī kā

kyuuñ Darte ho bāzār-e-hunar kyuuñ nahīñ jaate

har lahza hai jo sar ke liye ik na.ī Thokar

us zillat-e-har-roz se mar kyuuñ nahīñ jaate

ham jis ke liye zinda haiñ bā-hāl-e-pareshāñ

ab vo bhī ye kahtā hai ki mar kyuuñ nahīñ jaate

kyuuñ gosha-e-ḳhalvat se nikalte nahīñ 'aslam'

baiThe haiñ jidhar log udhar kyuuñ nahīñ jaate

hangama-e-hasti se guzar kyun nahin jate

raste mein khaDe ho gae ghar kyun nahin jate

mai-KHane mein shikwa hai bahut tira-shabi ka

mai-KHane mein ba-dida-e-tar kyun nahin jate

ab jubba-o-dastar ki waqat nahin baqi

rindon mein ba-andaz-e-digar kyun nahin jate

jis shahr mein gumrahi aziz-e-dil-o-jaan ho

us shahr-e-malamat mein KHizar kyun nahin jate

tosha nahin koi nasim-e-sahari ka

be-rahila o zad-e-safar kyun nahin jate

shayad ki shanasa ho koi be-hunari ka

kyun Darte ho bazar-e-hunar kyun nahin jate

har lahza hai jo sar ke liye ek nai Thokar

us zillat-e-har-roz se mar kyun nahin jate

hum jis ke liye zinda hain ba-haal-e-pareshan

ab wo bhi ye kahta hai ki mar kyun nahin jate

kyun gosha-e-KHalwat se nikalte nahin 'aslam'

baiThe hain jidhar log udhar kyun nahin jate